Embaixadór EUA iha Timor-Leste, Charles Kevin Blackstone. Imajen TATOLI/Egas Cristóvão

DILI, 02 agostu 2021 (TATOLI)–Embaixadór Estadu Unidu Amérika (EUA) iha Timor-Leste, Charles Kevin Blackstone, anúnsia sei rezigna-an hosi kargu tanba razaun persoál balun, ne’ebé nia sei repatria iha tinan ne’e nia laran hafoin husik kargu atuál.

“Tanba sirkunstánsia pesoál urjente, ha’u sei rezigna-an hosi kargu Embaixadór no sei fila hikas ba Estadu Unidu Amérika iha inísiu fulan-agostu ne’e. Onra ida ba ha’u, iha ha’u-nia moris tomak mai serví hanesan Embaixadór Timor-Leste no servisu hamutuk ho funsionáriu dedikadu, profisionál hosi misaun EUA iha Timor-Leste,” refere nota ne’ebé Agência TATOLI asesu, iha pájina EUA iha Timor-Leste, segunda ne’e.

Diplomata ne’e konsidera, ospitalidade timor-oan sira impresiona, ne’ebé halo nia kontinua rai nu’udar memória, nune’e bainhira fila bá Amérika, nia parte sei kontinua hametin relasaun bilaterál entre nasaun rua ne’e.

Notísia relevante: Prezidente Repúblika simu karta kredensiál hosi nasaun rua

“Ha’u sei rai metin memória barak ne’ebé ha’u hetan durante ha’u-nia tempu iha ne’e. Ha’u orgullu profundamente ho servisu misaun EUA hodi hametin parseria importante, rohan la’ek  no amizade entre Estadu Unidu Amérika no Timor-Leste,” nia subliña.

Iha loron 19 marsu 2021, Prezidente Repúblika, Francisco Guterres ‘Lú olo’, simu karta kredensiál hosi Embaixadór EUA Blackstone, iha Palásiu Prezidensiál.

Durante, mandatu nu’udar Embaixadór, Blackstone konsege halo kooperasaun bilaterál ho di’ak hodi apoiu seguransa no dezefa no apoiu Estadu Timor-Leste atu luta kombate COVID-19.

Notísia relevante: Timor-Leste no EUA asina nota entendimentu ba kestaun rua

Nune’e mós, konsege asina nota entedimentu ho Estadu Timor-Leste halo reabilitasaun konjuta ba Aeródromo Baucau no apoiu potensiál ba setór aviasaun sivíl sira.

Aleinde ne’e, Diplomata ne’e koñesidu ativu tebes iha ninia misaun iha Timor-Leste, ne’ebé bainhira hahú halo knaar, nia halo vizita ba instituisaun Estadu no parseiru seluk tan.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here