Vise Primeiru-Ministru no Ministru Planu no Ordenamentu, José Maria dos Reis, no Embaisadór EUA ba Timor-Leste, Kevin Blackstone, asina nota entendimentu, iha salaun MPO, Fatuhada, segunda (28/06). Imajen TATOLI/Francisco Sony

DILI, 28 juñu 2021 (TATOLI)–Governu Timor-Leste reprezenta hosi Vise Primeiru-Ministru no Ministu Planu no Ordenamentu, José Maria dos Reis, no Estadu Unidu Amérika (EUA, sigla portugés) reprezenta hosi Embaixadór iha Timor-Leste, Kevin Blackstone, asina nota entendimentu atu halo reabilitasaun konjuta ba Aeródromo Baucau no apoiu potensiál ba setór aviasaun sivíl.

Iha diskursu, Vise Primeiru-Ministru José Reis,  hateten, país rua realiza seremónia ne’e nu’udar reafirmasaun ba relasaun bilaterál  no kompromisu komun atu promove dezenvolvimentu ekonómiku Timor-Leste.

Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Francisco Sony

“Nu’udar Reprezentante Governu no bazeia ba delegasaun kompeténsia ne’ebé ha’u simu hosi Konsellu Ministru, ohin ami asina memorandu entendimentu rua relasiona ho kooperasaun bilaterál reabilitasaun Aeródromo Baucau no apoiu potensiál ba setór aviasaun sivíl Timor-Leste,” Vise Primeiru-Ministru hateten hafoin asina akordu iha edifísiu MPO, Fatuhada, segunda ne’e.

Nune’e, parte rua sei foti medida atubele hahú projetu reabilitasaun konjunta ba Aerodromo Baucau no hahú diskusaun kona-ba apoiu potensiál setór aviasaun sivíl Timor-Leste , ne’ebé sei bele ajuda dezenvolve programa atu promove dezenvolvimentu ekonómiku no diversifika área aviasaun sivíl.

Notísia relevante: Governu TL-EUA sei selebra akordu projetu reabilitasaun aeródromu Baucau

Projetu reabilitasaun konjunta ba Aeródromo Baucau  nu’udar objetivu másimu atu halo edifikasaun ba kapasidade diversifikasaun ekonomia, ne’ebé daudaun sai frajil liután tanba pandemia COVID-19.

“Sai pilár importante no fundamentál ba ekonomia nasionál hanesan defeza no seguransa ba rekursu ekonómiku sira,” nia akresenta.

Projetu ne’e sei iha dezenvolvimentu ekonómiku nu’udar foku prinsipál no Aeródromo Baucau sei sai ho natureza aviasaun sivíl ho diresaun ba atividade komersiál sira, no projetu ida ne’e sei sai mos nu’udar reforsu ida ba kapasitasaun FALINTIL-Forsa Defeza Timor-Leste (F-FDTL) .

Vise Primeiru-Ministru no Ministru Planu no Ordenamentu, José Maria dos Reis, no Embaisadór EUA ba Timor-Leste, Kevin Blackstone, asina nota entendimentu, iha salaun MPO, Fatuhada, segunda (28/06). Imajen TATOLI/Francisco Sony

Pasu  ne’e sei kontribui ba progresu planu ne’ebé iha ona ba dezenvolvimentu rejiaun leste, espesifikamente ba nasaun tomak.

“Ami sei prepara halo orsamentasaun ba tinan oin liuhosi Fundu Infraestrura, atu hala’o estudu viabilidade ho hanoin atu iha futuru badak, bele transforma Aeródromo Baucau atu sai nu’dar Aeroportu Internasional Baucau, atu hametin objetivu hodi dezenvolve infraestrutura estratéjiku, hanesan aliserse ba dezenvolvimentu no diversifikasaun ekonómiku,” nia hatutan.

Infraestrutura ida ne’e, ho kualidade di’ak no sei permite iha transporte nasionál no internasionál ba ema no merkadoria, ho modelu dezenvolvimentu planeadu ba Baucau, no asente iha dezenvolvimentu ba setór sira ne’ebé presiza ligasaun lais no efikásia ho rejiaun sira seluk iha Timor-Leste no rai-li’ur.

Tuir Ministru, infraestrutura ne’e sei kontribui ba kriasaun kampu traballu, negósiu kiik sira no atividade apoiu sira ba aeroportu internasionál ida, fatór sira ne’ebé hanesan fatór boot ba objetivu reforsu sidade Baucau iha ámbitu ierarkia urbana Timór no ba diversifikasaun ekonomia nasionál.

Ho projetu ne’e, Timor-Leste bele hakat pasu barak ba oin, objetivu boot atu lori dezenvolvimentu ba rejiaun no área hotu hotu Timor-Leste, ne’ebe inkluzivu no justu, no atu hasai povu hosi kiak no mukit.

“Ha’u lori Governu Timor-Leste nia naran, hakarak hato’o obrigadu ba Governu Amérika ba kooperasaun ida-ne’e no ita sei kontinua serbisu nafatin ba dezenvolvimentu Timor-Leste ,” nia hatutan.

EUA apoiu Timor-Leste sein iha interese

Iha biban hanesan, Embaixadór  EUA ba Timor-Leste, Kevin Blackstone, konsidera inisiativa ne’e ho intensaun boa fé, hodi dezenvolve setór aviasaun sivíl iha Timor-Leste.

“Ha’u hakarak klarifika katak EUA apoiu laiha interese ruma, maibé hakarak ajuda tanba Governu Timor-Leste hato’o pedidu apoiu reabilitasaun aeroportu Baucau iha tinan 2018, ne’ebé entendimentu ne’e reflete ami-nia kompromisu ba pedidu ne’e,” nia afirma.

Projetu ne’e, finansia hosi Ministériu Defeza no EUA aloka orsamentu millaun $10,6 hodi hadi’a kapasidade Timor-Leste iha área seguransa, asisténsia umanitária no operasaun ba dezastre naturál hodi kontribui ba dezenvolvimentu ekonomia ne’ebé reziliente no diversifikada.

Embaixadór EUA ba Timor-Leste, Kevin Blackstone. Imajen TATOLI/Francisco Sony

Apoiu ne’e, inklui dezenvolvimentu komponente aéreu F-FDTL, konstrusaun eskala kiik hodi hadi’a seguransa no kapasidade armazenamentu Aeroporto Baucau.

Inklui doasaun aviaun Cessna 206 ida fábrika iha EUA, instalasaun bareira (lutu) seguransa, konstrusaun armazen ba ekipamentu no ekipamentu Amérika nian ho kualidade a’as hanesan karreta tula kombustível, kareta bombeiru, forklift, kamioneta rua Ford F-350, karreta hamoos pista no veíkulu apoiu seluk ba seguransa ekipamentu aeroportu.

Notísia relevante: Apoia reabilita Aeroportu Baucau, EUA laiha intensaun atu uza

Aviaun ne’e sei inklui họ kámera ho teknolojia avansadu atu F-FDTL utiliza ba observa Timor-Leste nia área marítima inklui hodi responde ba dezastre naturál.

Nune’e, Embaixadór EUA orgullu atu apoia dezenvolvimentu komponente Aéreu F-FDTL ne’ebé sei ajuda proteje Timor-Leste ninia soberania no direitu ekonómiku, no seguransa nasionál.

Projetu Aeroportu Baucau sei kria oportunidade ba dezenvolvimentu ekonomia, inklui turizmu iha parte leste nasaun.

“Hau orgullu ho parseria besik no mútua entre Estadu Unidu no Timor-Lest. Entendimentu ne ‘e reflete parseria seguransa no ekonomia iha tempu naruk entre país rua,” Embaixadór Blackstone hateten.

Ministra Negósiu Estranjeiru no Kooperasaun, Adaljiza Albertina Xavier Reis Magno sai sasin ba seremónia ne’e.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here