DILI, 31 jullu 2021 (TATOLI)–Xefe Estadu Maior Jenerál FALINTIL-Forsa Defeza Timor – Leste (F-FFDTL), Tanente Jeneral Lere Anan Timur, husu ba membru PSHT sira atu hametin estabilidade no pás iha nasaun Timor-Leste hodi kontribui ba dezenvolvimentu nasionál.
Notísia Relevante: GAM tolu submete ona dokumentu ba KRAM
“Atu imi PSHT, organizasaun saida de’it, imi-nia dever mak kontribui ba estabilidade no pás iha Timor-Leste, tanba imi mak sai parseiru ba ita-nia Governu. Ita-nia Estadu ida de’it. Ita-nia Governu ida de’it. Bandeira mak RDTL. Ita ukun an dala ida, la’ós dala rua. Imi jerasaun foun sama tuir jerasaun tuan sira nia ain fatin,” Tenente Jenerál Lere Anan Timur hateten bainhira partisipa iha kongresu estraordinária PSHT nian ho tema ‘Hametin, Haburas Paz no Estabilidade Kontribui ba Dezenvolvimentu Nasionál’ ne’ebé hala’o iha salaun Timor Lodge, Dili, sábadu ne’e.
Tenente Jenerál Lere Anan Timur rekoñese organizasaun Persaudaraan Setia Hati Terate (PSHT) nia kontribuisaun ba luta libertasaun nasionál iha tempu rezisténsia.
“Ita-nia nasaun ida-ne’e harii ho ruin ho raan. PSHT nia membru barak mós mak fakar raan ba rai ida-ne’e hodi ohin loron ita hetan independénsia. Uluk iha rezisténsia, ha’u rasik simu atributu PSHT nian iha ha’u-nia abrigu. Imi mós kontribui ba ukun aan ne’e,” nia dehan.
Iha fatin hanesan, Prezidente Konsellu Veteranu Vidal de Jesus ‘Riak Leman’ fó sasin mós katak PSHT iha duni kontribuisaun ba luta independensia Timor-Leste nian hanesan mós organizasaun sira seluk.
“PSHT uluk ho organizasaun ida Fuan Domin, membru PSHT lubuk ida tur iha kaixa klandestina nian. Iha funu ita unidade kapaas loos. Mantein nafatin unidade ne’e hodi hametin estabilidade iha nasaun ne’e. Imi membru PSHT mós mate barak ba ukun an ne’e,” Riak Leman hateten.
Kongresu ekstraordinária PSHT nian ne’e halao tanba atu prenxe kritéria ne’ebe Komisaun Reguladór Arte Marsial (KRAM) fó sai hodi bele ba rejistu iha notariadu atu sai hanesan organizasaun legal iha Timor-Leste.
Kongresu ne’ebé hala’o loron ida-ne’e, partisipa hosi membru no reprezentante PSHT hosi Munisipiu 12 no Rejiaun Administrativa Espesiál Oé-Cusse Ambeno (RAEOA).
Notísia Relevante: PM Taur dezeja PSHT organiza-an di’akliu hafoin kongresu
Jornalista : Hortencio Sanchez
Editór : Cancio Ximenes
