Primeiru-Ministru, Taur Matan Ruak. Imajen Tatoli/Francisco Sony.

DILI, 31 jullu 2021 (TATOLI)—Primeiru-Ministru (PM), Taur Matan Ruak, sábadu ne’e marka prezensa iha Kongresu Estraordinária Persaudaraan Setia Hati Terate (PSHT) ho tema ‘Hametin, Haburas Paz no Estabilidade Kontribui ba Dezenvolvimentu Nasionál’ ne’ebé realiza iha salaun Timor Lodge, Dili.

Taur Matan Ruak dezeja no konsidera katak, kongresu estraordinária ne’ebé hili tópiku ne’e di’ak tebes no importante ba nasaun.

Notísia Relevante: KRAM Sosializa Regra Arte Marsiál Ba PSHT, IKS ho KORK

“Ho kongresu ida-ne’e sei halo desizaun barak. Organiza-an di’ak liu. Impoin disiplina di’ak liu ba organizasaun. SEJD tau-matan bele ofisializa organizasaun, kria kondisaun ba treinu ita-nia oan-sira. Buat ne’ebé Governu bele, Governu bele halo tanba imi kuandu gagál ne’e ema dehan, Matan Ruak uluk Primeiru-Ministru nia mak halo tiha agora husu fali ba nia.  Kuandu ha’u altera rezolusaun ne’e, balun dehan labarik sira tuku malu ne’e dehan husu ba Primeiru-Ministru. Maibé ha’u nia prinsipiu, ida-ne’e ema ida-rua, la reprezenta organizasaun,” Taur Matan Ruak hato’o liuhosi intervénsaun.

Xefe Governu ne’e husu atu lideransa sira komunika ho Governu liuhosi Sekretária Estadu Juventude no Desportu kuandu hakarak rejista ka buka fatin hodi treinu.

“Imi lalika ba treinu iha nakukun laran. Treinu iha ne’e, ne’e imi nia rain, Hanesan Ministru Interiór ha’u ulun fatuk moras loos,” Eis Xefe Estadu ne’e hateten.

Eis Gerrileiru ne’e subliña, esforsu ba-oin mak hametin, haburas, mantein iha regra sira, fó apoiu másima.

“Ami konfia imi. Ita-boot sira iha lideransa ne’ebé halo ha’u admira la’ós de’it iha imi, iha instituisaun hotu-hotu, matenek, formadu ne’ebé bele lidera imi. Ami fiar lideransa-sira konfia mós imi. Sala ne’e sempre iha. Importante mak ita-nia esforsu atu hadi’a. Entaun, ha’u husu imi hotu nia ajuda, ita hadi’a para aban bainrua ema seluk trata imi, trata to’o ha’u,” nia salienta.

Eis Prezidente Repúblika ne’e kompromete katak, Governu iha dispozisaun tomak atu koopera hodi ajuda ultrapasa difikuldade saida de’it ne’ebé mak organizasaun iha hodi konsolida tuir regra sira-ne’ebé Lei númeru 5/2017 determina.

Jornalista : Antónia Gusmão

Editór       : Cancio Ximenes

HAKEREK NO HATÁN

Please enter your comment!
Please enter your name here