Prezidente CNE, Alcino Barris. Imajen/TATOLI Egas Cristovao.

DILI, 30 jullu 2021 (TATOLI)—Prezidente Komisaun Nasionál Eleisaun (CNE sígla portugés), Alcino de Araújo Barris, husu média liuliu jornalista-sira tenke domina matéria, prosesu no sistema eletorál, ba eleisaun jerál Prezidensiál iha 2022 no eleisaun Parlamentár iha 2023.

“Husu ba média-sira tenke domina matéria, prosesu tomak, no sistema eleitorál. Komesa hosi Konstituisaun RDTL, lei-sira no regra-sira,” Alcino Barris, hateten bainhira sai oradór prinsipál, iha kolókiu ne’ebé Agência Noticiosa de Timor-Leste realiza ho tema ‘Papél Tatoli,I.P ba susesu eleisaun Prezidensiál iha tinan 2022’, iha edifísiu Faról, sesta ne’e.

Notísia relevante:Kobertura média nasionál-sira ba eleisaun jerál tenke iha integridade jornalizmu

Prezidente CNE husu ne’e tanba, bainhira média domina aspetu hirak-ne’e, sei bele fó informasaun loloos no bele hasa’e kualidade partisipasaun eleitorál.

Alcino Barris  rekoñese katak, CNE hanesan órgaun ida ne’ebé superviziona ho independente, ne’ebé durante ne’e koopera di’ak liu ho média-sira hodi aposta iha informasaun.

Tanba ne’e, nia hatutan, atu garante prosesu ne’e ho suseseu tenke hetan kooperasaun di’ak mós hosi públiku, maibé dahuluk mak informasaun ne’ebé ho loloos.

“CNE kuandu tama ona iha prosesu periúdu ida ne’ebé hahú ona eleisaun nian, pré-eleisaun, ativamente fahe informasaun iha ámbitu ne’e, ninia liman-ho-ain mak média inklui Tatoli,I.P  ne’ebé halo kobertura barak ba atividade CNE,” nia subliña.

Nia espera katak, Tatoli,I.P hanesan Agência Estadu, hanesan mós liman-ain hodi fahe informasaun ne’ebé di’ak no buras, sei kontribui ba susesu eleisaun jerál liuliu eleisaun Prezidensiál iha 2022.

Notísia relevante:Perante eleisaun jerál, Tatoli,I.P tenke sai portavós umanístika

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here