Diretór Komisaun Justisa no Pás Arkedioseze Dili, Padre Demétrio da Conceição Xavier. Imajen Tatoli/Egas Cristóvão.

DILI, 30 jullu 2021 (TATOLI)—Diretór Komisaun Justisa no Pás Arkedioseze Dili, Padre  Demétrio da Conceição Xavier, konsidera no husu Agência Notícia Timor-Leste Tatoli,I.P, atu assume papél hanesan portavóz umanistika, hodi lori susesu ba eleisaun Prezidensiál iha 2022 no eleisaun jerál Parlamentár iha 2023.  

Padre Demétrio da Conceição Xavier, hato’o konsiderasaun no husu ne’e, bainhira sai oradór prinsipál, iha kolókiu ne’ebé Agência Noticiosa de Timor-Leste realiza ho tema ‘Papél Tatoli,I.P ba susesu eleisaun Prezidensiál iha tinan 2022’, iha edifísiu Faról, sesta ne’e.   

Notísia relevante:Kobertura média nasionál-sira ba eleisaun jerál tenke iha integridade jornalizmu

Nia dehan, bainhira haree hosi sentidu naran Tatoli, bele dehan Agência Noticiosa ne’ebé kredível tanba la’ós tuur de’it iha fatin hodi inventa notísia no espalla hoax ba sosiedade, maibé notísia-sira ne’ebé fo-sai sempre bazeia ba realidade iha fatin akontesimentu.

“Ita boot-sira hanesan portavóz umanístika. Bele mós kompara ho Profeta Bíblika-sira ne’ebé simu Maromak Nia lia-fuan hosi leten, hafoin haklaken ba mundu hodi haroman ema barak nia moris. Ita boot-sira nia profissaun simu lia-fuan tomak hosi situasaun no kondisaun reál ema  nian iha terrenu, hafoin fahe fali ka informa fali ba sosiedade iha mundu atu ema tomak bele informadu,” nia subliña.

Padre Demétrio da Conceição, fó ninia abreviatura kona-bá lia-fuan Tatoli katak, informa, transmite, divulga, haklaken, fó-sai, habelar akontesimentu ruma iha terrenu atu ema tomak bele sintoniza, rona, bele haree no bele lee.

Nia husu Tatoli,I.P atu  Tama ba realidade ka lian Indonézia dehan, ba iha Tempat Kejadian Perkara (TKP), Toka no asiste direta realidade ne’e ho sensibilidade-rasik no halibur informasaun hosi parte hotu, Lori imformasaun tomak mai fatin hodi halo editing to’o tasak  molok divulga ba públiku, Informa fali ba sosiedade tomak atu bele hatene realidade loloos iha terrenu nu’udár evidénsia konkreta ho linguajen jornalístika ne’ebé nakonu ho arte.

Kona-bá esperiénsia ba eleisaun, nia fiar katak, Tatoli,I.P nu’udár Agência Estadu iha ona esperiénsia ba aktu demokrátiku ne’e, tanba ezisténsia desde 2012 prosesu eleisaun  tuir-mai Tatoli,I.P sei hasoru nafatin.

“Papél ita boot sira-nian ne’ebé tenke kontribui ba susesu eleisaun Prezidensiál maka, transmite informasaun ne’ebé kredível, loloos no momoos, tuir buat ne’ebé tau ona iha ita boot sira-nia profile. Hahú hosi tempu preparasaun, ezekusaun eleisaun no rezultadu eleisaun,” nia fó-hanoin.

Kolókiu ne’e realiza iha ámbitu komemorasaun aniversáriu ba dala-lima (5) ho tema: Olhar o Passado, atuar no presente e projetar no futuro ka hateke ba pasadu, hala’o iha prezente no projeta ba futuru.

Notísia relevante:Kolókiu, ‘Papél Tatoli,I.P ba susesu eleisaun Prezidensiál 2022’

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here