Eis Prezidente Repúblika, José Ramos Horta. Imajen/Egas Cristovão

DILI, 30 jullu 2021 (TATOLI)—Eis Prezidente Repúblika, José Manuel Ramos Horta, husu média nasionál-sira, bainhira hala’o kobertura ba eleisaun jerál Prezidensiál iha tinan 2022 no eleisaun jerál Parlamentár iha 2023, tenke iha integridade jornalizmu.

“Husu atu hotu-hotu tenke tuir regra, tenke iha integridade jornalizmu no labele inventa,” José Manuel Ramos Horta husu ne’e, bainhira sai oradór prinsipál, iha kolókiu ne’ebé Agência Noticiosa de Timor-Leste realiza ho tema ‘Papél Tatoli,I.P ba susesu eleisaun Prezidensiál iha tinan 2022’, iha edifísiu Faról, sesta ne’e.

Notísia relevante:Kolókiu, ‘Papél Tatoli,I.P ba susesu eleisaun Prezidensiál 2022’

Laureadu Nobel da Pás ne’e mós la konkorda bainhira públiku ezije atu mídia privadu-sira tenke neutru iha kobertura ba atividade partidu polítiku no eleisaun-sira.

“Atu dehan, Agência Tatoli,I.P no RTTL,E.P tenke neutru, tanba ne’e instituisaun públiku, maibé atu hateten fali GMN-TV, Tempo Timor, Timor Post atu neutru ne’e ha’u la konkorda,” nia espressa.

Horta fó nafatin atensaun katak, iha kobertura labele inventa, signifika, líder polítiku ida ka kandidatu ida hateten buat ida, sira hakerek buat seluk no dala ruma títulu ne’e la korresponde ba substánsia artigu ne’e.

“Liberdade tenke liberdade duni, liberdade ba ita hotu-hotu atu ko’alia, liberdade ba jornál, televizaun no rádiu atu apoia kandidatu-sira ne’ebé sira hakarak, maibé hotu-hotu tenke tuir prinsípiu deontolójiku,” nia subliña tan.

Líder nasionál ne’e konta mós katak, jornál-sira iha direitu atu apoia kandidatu sé de’it, tanba akontese iha nasaun-sira seluk hanesan Estadu Unidu Amérika (EUA), hanesan New York Time no Washintong Post sempre apoia demokrátiku no sira-seluk apoia Partidu Republikanu, maibé nafatin iha prinsípiu deontolójiku.

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here