Prezidente Repúblika, Francisco Guterres Lú Olo, Prezide Reuniaun Konsellu Estadu iha Palásiu Prezidente Nicolau Lobato, Bairru Pite, Dili. Imajen Tatoli /Egas Cristovão.

DILI, 26 jullu 2021 (TATOLI)—Hafoin reuniaun Konsellu Estadu no Konsellu Superiór Defeza no Seguransa, konsellu rua ne’e ho unanimidade rekomenda ba Prezidente Repúblika Francisco Guterres “Lú Olo” atu haruka karta ba Parlamentu Nasionál hodi halo estensaun ba Estadu Emerjénsia.

Notísia Relevante: PR Lú Olo dekreta Estadu Emerjénsia ba dala XV

“Ohin reuniaun Konsellu Estadu no Konsellu Superiór Defeza no Seguransa, sira rekomenda ba Prezidente Repúblika kona-ba pedidu Governu nian atu hato’o ba Parlamentu Nasionál, depois Parlamentu Nasionál diskute atu estende ka lae Estadu Emerjénsia ne’e,” Xefe Kaza Sívil hateten ba jornalista sira, iha Palásiu Prezidensiál Nicolau Lobato, Bairru Pite, Dili, segunda ne’e.

Pedidu hosi Governu atu estende Estadu Emerjénsia ne’e tanba variante foun Delta COVID-19 ne’ebé mak agora espalla iha nasaun viziñu Indonézia liu-liu iha Nusa Tenggara Timuer (NTT) ne’ebé besik liu Timor-Leste.

Membru Konsellu Superiór Defeza no Seguransa ne’ebé partisipa iha reuniaun ne’e mak hanesan Prezidente Repúblika (PR) Francisco Guterres Lú Olo, Primeiru-Ministru (PM) Taur Matan Ruak, Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, Ministru Defeza no Ministru Interiór interinu Filomeno da Paixão de Jesus, Ministru Justisa (MJ) Manuel Carceres. Hosi Parlamentu Nasionál, David Dias Ximenes, Abel Pires da Silva, Xefe Estadu Maiór Jenerál FALINTIL Forsa Defeza Timor Leste (F- FDTL), Tenente Jenerál Lere Anan Timur, Komandante Jerál Polisia Nasionál Timor-Leste Komisáriu Faustino da Costa, no Diretór Ezekutivu Forum Organizasaun Naun Governamentál (FONGTIL) Daniel Santos do Carmo.

Entretantu, membru Konsellu Estadu ne’ebé partisipa iha reuniaun ne’e mak atuál Xefe Estadu) Francisco Guterres Lú Olo, Primeiru- Ministru (PM) Taur Matan Ruak, Eis Prezidente Repúblika José Manuel Ramos Horta, Prezidente Parlamentu Nasionál Aniceto Guterres Lopes, membru ne’ebé nomea hosi Prezidente Repúblika mak hanesan Prezidente Kámara Komérsiu Indústria (CCI- TL-sigla portugés) Oscar Lima, Prezidente Komisaun Nasionál Eleisaun (CNE-sigla portugés) Alcino de Araújo Barris, no nomea hosi Parlamentu Nasionál mak hanesan Aurora Ximenes, José Cornelio Guterres, Arcánjelo de Jesus Gouveia Leite, no José dos Santos (Naimori Bukar).

Dadus hosi Sentru Integradu Jestaun Krize (SIJK) haktuir katak kazu COVID-19, Kumulativu kazu konfirmadu sura hosi 21 marsu 2020 to’o 25 jullu 2021 hamutuk 10.3498. Kazu rekuparadu 41 no kazu ativu iha 695.

Iha loron 25 jullu 2021, izolamentu Vera Cruz halo tratamentu ba kazu detetadu na’in 16. Iha área obstetrisia na’in-haat (4), iha medisina interna na’in-sai (9), iha sirurjia na’in-rua (2), pediátria na’in-ida (1).

Sira na’in-haat (4) iha obstetrisia, kategória leve (mild) hotu; Hosi sira na’in-sia (9) iha medisina interna na’in-rua (2) grave ida (1) uza ventilador, ida (1) ho oksijéniu, na’in-tolu (3) moderadu, na’in-haat (4) leve (mild); Sira na’in-rua (2) iha sirurjia, kategória leve (mild) hotu; Ida (1) iha pediátria kategória leve.

Notísia Relevante: Update COVID-19: Kazu detetadu foun 11

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here