Prezidente Repúblika, Francisco Guterres ‘Lú Olo’. Imajen TATOLI/Egas Cristóvão

DILI, 03 jullu 2021 (TATOLI)— Prezidente Repúblika (PR), Francisco Guterres Lú Olo, liuhosi Dekretu númeru 39/2021, 30 juñu,  dekreta Estadu emerjénsia ba dasanuluk-resin-lima (XV) ba loron tolu-nulu (30), hahú hosi sesta tuku 00.00 iha 2 jullu 2021 no termina iha sábadu tuku 23.59 iha 31 jullu 2021.

Komunikadu ne’ebé fó-sai hosi Prezidénsia Repúblika, hateten haree ba númeru kazu COVID-19 ne’ebé aumenta, Estadu kontinua foti medida prevensaun no kombate kontájiu virus SAR-CoV-2.

Notísia relevante:Parlamentu Nasionál autoriza Prezidente Repúblika dekreta Estadu Emerjénsia ba dala-XV

“Estensaun no deklarasaun ba Estadu Emerjénsia mai ho fundamentu iha subsisténsia ba situasaun kalamidade públika,” komunikadu ne’e haktuir.

Timor-Leste rejista liu atus-ualu (800) kazu ativu konfirmadu, ho totál númeru akumuladu liu rihun-sia (9000)  desde inísiu kazu dahuluk rejistadu iha marsu 2020. Virus corona hamate ona ema hamutuk na’in-24 asosiadu ho ho COVID-19 iha territóriu nasionál tomak.

Prezidente Repúblika dekreta Estadu emerjénsia hafoin pedidu estensaun aprova iha Parlamentu Nasionál.

Molok ne’e, Konsellu Superiór Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasionál atu halo estensaun ba Estadu emerjénsia ba dala-15  nu’udár dalan atu proteje saúde públika.

Deklarasaun estadu emerjénsia sei abranje territóriu nasionál tomak.

Estadu emerjénsia sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia,  direitu reuniaun no manifestasaun, liberdade ba kultu, direitu ba edukasaun no direitu propriedade, direitu ba rezisténsia,  no inisiativa ekonómika privada.

Autoridades públika kompetente-sira sei impoin medida importante hodi prevene importasaun estirpes foun SARS-CoV-2 ba territóriu nasionál no permite kontensaun no nia alastramentu entre populasaun liuhusi dalan taka fronteiras, bandu estranjeiru sira mai territóriu nasionál, estabelesimentu regra distansiamentu sosiál, impozisaun ba obrigasaun halo teste, izolamentu ba pasiente infetadu, konfinamentu domisiliáriu no determinasaun serka sanitária.

Governu mak define medida implementasaun ba Estadu emerjénsia ba sanuluk-resin-lima.

Desde fulan marsu 2020, hafoin rejista kazu konfirmadu ida ho SARS CoV-2, Timor-Leste implementa kedan Estadu emerjénsia atu fó kbiit ba Governu atu foti medida prevensaun no kontrolu hodi hases sidadaun hotu-hotu hosi kalamidade públika ne’ebé bele mosu hosi moras COVID-19.

Jornalista: Osória Marques

Editór: Cipriano Colo

HAKEREK NO HATÁN

Please enter your comment!
Please enter your name here