Agrikultór suku Lalisuk sub Rejiaun  Pante Makasar, Rejiaun Administrativa Espesiál Oé-Cusse Ambeno (RAEOA), daudaun ne’e foin hahú halai-natar  iha área Holosa hodi kuda hare.Imajen/Tatoli Abilio Elo NIni.

OÉ-CUSSE, 22 jullu 2021 (TATOLI)-Agrikultór suku Lalisuk sub Rejiaun  Pante Makasar, Rejiaun Administrativa Espesiál Oé-Cusse Ambeno (RAEOA), daudaun ne’e foin hahú halai-natar  iha área Holosa nian hodi kuda hare ba époka 2021.

Tuir loloos komunidade agrikultór sira halai ona natar iha fulan-janeiru liubá maibé la konsege distribuisaun bee ba natar sira la sufisiente tanba volume bee menus.

Notísia Relevante :Barajen Tono benefísia natar ektare 1.717 iha Pante Makasar

Reprezentante agrikultór Marculino Obe, dehan iha tinan 2020, komunidade agrikultór sira iha fatin ne’ebá la konsege halai sira-nia natar

Agrikultór suku Lalisuk sub Rejiaun  Pante Makasar, Rejiaun Administrativa Espesiál Oé-Cusse Ambeno (RAEOA), daudaun ne’e foin hahú halai-natar  iha área Holosa.Imajen/Tatoli Abilio Elo Nini.

“Ami iha Holosá foin mak hahú faze primeiru tanba volume bee iha irigasaun Tono sufisiente bele to’o outubru no novembru, natar sira ne’e tuir loloos nia tempu iha janeiru liubá maibé ami labele halai tanba ami sei hein udan-been kuando di’ak entaun halai natar, maibé tuir ami-nia hare udan-been tinan ne’e sufisiente,”nia dehan ba TATOLI, iha Pante Makasar, kinta ne’e.

Iha fatin hanesan Agrikultór Domingos Soares, reforsa iha tinan 2019, agrikultór sira konsege halai-natar maibé maioria  la kolleta tanba bee menus hodi afeta ba hare mate hotu.

“Iha tinan  2019, hare balun aat totál la kolleta tanba bee uitoan de’it, hare sira maran de’it iha fatin,” Nia esplika.

Nune’e mós xefe suku Lalisuk Ermenegildo Lalisuk,  hateten natar sira iha holosá atraza kuda iha tinan ne’e tanba akontese mudansa klimátika liliu bee menus atu distribui bee ba natar kuaze ektare 35.

Nia hateten natar sira iha área Bara-Santu,  Panite   no Holosá  nian uza hamutuk  bee husi irigasaun Tono entaun distribuisaun bee la sufisiente ba agrikultór hotu-hotu iha tempu hanesan.

Tanba ne’e maka agrikultór sira iha parte Holosá nian tenki adia halai-natar to’o fulan-jullu hafoin natar sira iha área Bara-Santu no Panite halo ona kolleta.

Entretantu totál populasaun iha suku Lalisuk hamutuk 3.375 kompostu hosi aldeia Usapibela hamutuk 751,  aldeia Manuimpena hamutuk 1.058,  aldeia Padiae hamutuk 902 no aldeia Banoco 668.

Notísia Relevante :Agrikultór natar suku Cunha hahú halai natar faze daruák

Jornalista:Abílio Elo Nini

Editór:Agapito dos Santos

HAKEREK NO HATÁN

Please enter your comment!
Please enter your name here