Agrikultór natar Petun, aldeia Noe-ninen, suku Cunha, sub-rejiaun Pante Makasar. Imajen Tatoli/Abilio Elo Nini.

OÉ-CUSSE, 24 juñu 2021 (TATOLI)—Agrikultór Natar, Francisco da Crus, hateten daudaun ne’e agrikultór sira iha suku Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno, hahú halai natar ba faze daruak nian tanba bee iha Irrigasaun Tono sufisiente.

“Iha primeiru faze halai natar hahú iha fulan janeiru uza bee-foer no kolleta iha fulan apríl foin lalais ne’e. Fulan maiu ami deskansa uitoan, agora ami bah alai natar faze daruak nian. Babain ema hosi rai boot dehan haree Membramo midar, autór servisu mak ami sira-ne’e,” Fransisco da Crus hateten ba Agência TATOLI, iha natar Petun, aldeia Noe-Ninen, kinta ne’e

Agrikultór natar Petun, aldeia Noe-ninen, suku Cunha, sub-rejiaun Pante Makasar. Imajen Tatoli/Abilio Elo Nini.

Irrigasaun Tono ne’ebé konstrui iha bairru Tono, aldeia Noe-Ninen ne’e, apoiu tebes agrikultór sira hodi halai natar hodi halo ona serimónia kolleta hare Membramo epoka dahuluk nian iha fulan apríl foin lalais, no sei kolleta tan ba epoka daruák nian iha fulan outubru 2021.

Fransisco da Cruz hateten, iha fulan-juñu daudaun ne’e agrikultór sira halai natar ba faze daruak nian uza bee mota Tono nia bee-matan, tanba irrigasaun nakonu ho sedimentasaun no iha okos bee suli nafatin ba baleta tama ba natar sira.

Nia hato’o agradesimentu ba Guvernu tanba irrigasaun ne’e ajuda tebes agrikultór sira, tanba bainhira udan estraga baleta ne’e, Ministériu Obra Públika mak hadi’a hodi fasilita agrikultór sira atu halo servisu.

“Uluk sedauk iha ierigasaun, fulan-juñu hanesan ne’e, tempu bailoron ona, mota sira mós maran ona, entaun ita labele halo buat ida no tinan ida halai natar dala ida de’it. Maibé, agora ne’e bele halai dala rua iha tinan ida-nia laran,” nia dehan.

Iha fatin hanesan, Jacinto Vás, hateten agrikultór natar sira iha suku ne’e hotu-hotu uza irrigasaun Tono hodi halai natar no balu uza bee ne’e hodi kuda modo, tanba sira lakohi estraga bee sulin saugate de’it.

“Babain ema sira iha suku Cunha no Lalisuk dehan ema Padiae, suku rua ne’e uza bee hosi irrigasaun Tono tanba iha agrikultór barak kuda modo oioin iha Padiae no faan iha merkadu, atu sustenta moris no selu oan sira-nia eskola,” nia hateten.

Xefe aldeia Noe-Ninen, suku Cunha, Jacob Nono hatete tinan ida-ne’e udan been di’ak entaun komunidade kontente halo servisu no halai natar ba faze daruak nian.

Xefe Aldeia Noe-Ninen, suku Cunha, Jacob Nono. Imajen Tatoli/Abilio Elo Nini.

“Agora natar Petun halai dala rua ona. Sira seluk hanesan Toip-Ana, Nunuheno, sira mós atu halai dalarua maibé agora balun sei kolleta hela haree. Sira seluk hetan estragu tanba foin dadauk inudasaun 4 apríl ne’e, mota estraga sira-nia natar balun, entaun Guvernu sei hadia hela nia kanu (baleta). Kuandu remata, iha suku Cunha sei kompleta halai natar dala rua iha tinan ida nia laran,” nia dehan.

Tuir dadus sensus uma kain tinan 2015, hatudu suku Cunha partensia ba Sub-rejiaun Pante Makasar ho total uma kain 918 ho totál populasaun 4.493, kompostu hosi aldeia lima (5) hanesan aldeia Noe-Ninen, aldeia Umenoah, aldeia Noa’pai, aldeia Noa-Fafo no aldeia Maunabeno.

Jornalista : Abilio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here