Vise-Ministra Finansa, Sara Lobo Brites, distribui pakote fiskál hosi tetu OJE 2022 ba reprezentante Primeiru-Ministru, iha salaun auditóriu MF, Aitarak-laran, sesta (16/07). Imajen TATOLI/Francisco Sony

DILI, 16 jullu 2021 (TATOLI)–Ministériu Finansa (MF) loke sesaun traballu hodi distribui pakote fiskál ba kada ministériu no instituisaun Estadu sira, hafoin Konsellu Ministru (KM) aprova ona tetu orsamentál tinan fiskál 2022.

Atividade ne’e simbólikamente Vise-Ministra Finansa, Sara Lobo Brites, entrega pakote fiskál ba órgaun soberanu hanesan Prezidénsia Repúblika, Parlamentu Nasionál (PN), Governu no Tribunál.

Durante intervensaun, Vise-Ministra Finansa husu ba jestór hotu atu esforsu kumpre kalendáriu ne’ebe KM aprova ona ba aktividade tuir mai, ho nune’e bele prosede ba Komisaun Revizaun Orsamentu Polítiku (KROP) molok aprezenta ba reuniaun ezekutivu tuir mai atu hetan aprovasaun no sei submete ba PN iha loron 01 outubru 2021 tuir espíritu iha Lei Enkuadramentu Orsamentu.

“Atu konkretiza kompeténsia ida-ne’e, loron rua liubá Konsellu Ministru aprova ona tetu agregadu no dezagregadu proposta Orsamentu Jerál Estadu (OJE) 2022 ho montante biliaun $1,5 hodi finansia setór prioritária neen,” Governante ne’e hateten iha salaun auditóriu MF, Aitarak-laran, sesta ne’e.

Notísia relevante: Governu aprova tetu agregadu OJE 2022 biliaun $1,5

Programa prioridade neen mak, dezenvolvimentu kapitál umanu kompostu hosi edukasaun, formasaun no saude, abitasaun no inkluzaun sosial, setór produtivu hanesan agrikultura, turizmu, ambiente no konetividade, dezenvolvimentu setór privadu no kooperativa, dezenvolvimentu rurál no boa governasaun.

Vise-Ministra Finansa, Sara Lobo Brites. Imajen TATOLI/Francisco Sony

Aprovasaun tetu agregadu no desagregadu fó kbiit ba MF nu’udar Departamentu Governamentál ne’ebé iha knaar atu dirije, hahú hosi preparasaun to’o aprovasaun proposta Lei OJE hodi distribui tetu ba kada instituisaun atubele hahú elabora idaidak nia programa, sub programa, no atividade bazeia ba prioridades neen ne’ebé mak Governu define ona.

“Hahú iha tinan 2015 to’o 2020, fazeadamente halo mudansa iha maneira prepara orsamentu hosi modelu konvensionál ba orsamentu pur programa. Ita-nia ekipa Unidade Planeamentu, Monitorizasaun no Avaliasaun (UPMA) ne’ebé nu’udar pioneiru ba reforma ida-ne’e, hamutuk ho Ministeriu Finansa no dirijente hotu halo esforsu koletiva hodi konsege apresenta OJE 2021 totalmente pur programa, aleinde klasifikasaun orgánika no klasifikasaun ekonómika no koñesidu pur kategoria,” Sara Lobo subliña.

Bainhira tama ba orsamentu pur programa, fó importánsia boot ba rezultadu ne’ebé bele prodús, la’ós saida mak atu sosa ka lista ba kompra.

Presiza kuidade define programa no atividade

Tanba ne’e, Vise-Ministra rekomenda ba instituisaun Estadu, haree ba rekursu finanseiru limitadu no presiza atende nesesidade oioin, presiza kuidadu define programa, sub programa no atividade hodi evita duplikasaun funsaun, evita despeza superfluos, no buka sukat tuir tetu aprovadu ne’ebé distribui ba kada instituisaun.

“Hahú tinan 2020 to’o agora, ita nafatin hasoru dezafiu oioin. Propagasaun surtu COVID-19 ne’ebé fó impaktu negativu ba atividade sosio-ekonómiku rai-laran kauza kresimentu negativu, tuir fali tinan 2021 ita nafatin enfreta hela propasaun surtu COVID 19 ne’ebé kontribui liután ho kalamidade ne’ebé fó sofrimentu ba ema barak no estragu iha infrastrutura lubuk ida hetok fó todan tan Governu,” Governante ne’e rekoñese.

Notísia relevante: Governu fó prioridade programa neen iha OJE 2022

Tanba ne’e, Sara Lobo enkoraja instituisaun Estadu hotu atu halo esforsu revee programa no prioridade ne’ebé trasa ona, tuir orientasaun ne’ebé sei divulga iha sirkulár atu orsamentu tinan 2022 bele kredível liután hodi promove kresimentu, atu mellora prestasaun servisu ne’ebé ho efikásia, efisiente, iha nosaun atu benefisia povu no justu inklui sensível ba jéneru.

“Ho nune’e, orsamentu ne’ebe Governu prepara atu lori mudansa ba moris sidadaun iha tinan tuir mai,” Vise-Ministra afirma.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here