Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (14/07). Imajen TATOLI/Egas Cristóvão

DILI, 14 jullu 2021 (TATOLI)—Governu liuhosi reuniaun Konsellu Ministru (KM), iha kuarta ne’e, aprova ona tetu agregadu no dezagregadu ba Orsamentu Jerál Estadu (OJE) tinan fiskál 2022, ne’ebe aprezenta hosi Vise-Ministra Finansa, Sara Lobo Brites.

“Aprova konjuntu inisiativa adisionál ne’ebé fixa tetu agregadu ho montante biliaun $1,571.6,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

Governu define ona prioridade nasionál neen ba orsamentu tinan oin, hanesan dezenvolvimentu kapitál umanu hanesan edukasaun, formasaun profisionál no saúde, abitasaun no inkluzaun sosiál, setór produtivu hanesan agrikultura no turizmu, ambiente no konektividade, dezenvolvimentu setór privadu, dezenvolvimentu rurál no boa governasaun.

Notísia relevante:  Governu fó prioridade programa neen iha OJE 2022

Aleinde ne’e, Vise-Ministra Finansa halo mós aprezentasaun ida kona-ba sorumutuk ho parseiru dezenvolvimentu sira tinan 2021 ka Timor-Leste and Development Partners Meeting (TLDPM), ne’ebé sei realiza iha Auditóriu Ministériu Finansa, iha loron 30 jullu.

TLDPM hahú uluk ho  sorumutuk bilaterál iha loron 27 jullu, liuhosi sorumutuk ida kona-ba integrasaun ekonómika rejionál iha loron 28 jullu no fórum ida hanaran Organizasaun Mundiál Komérsiu iha loron 29 jullu.

“Sorumutuk ida-ne’e ho parseiru dezenvolvimentu sira organiza  kada tinan hosi Governu hodi fahe vizaun ba oin, analiza prioridade ba médiu prazu no haree ba progresu ne’ebé alkansa ona iha dezenvolvimentu nasionál,” Ministru informa.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here