Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 24 fevereiru 2021 (TATOLI)–Reuniaun Konsellu Ministru (KM) ne’ebé prezide hosi Vise Primeiru-Ministru no Ministra Solidariendade Sosiál no Inkluzaun (MSSI), Armanda Berta dos Santos, analiza proposta kriasaun komisaun ba implementasaun parke industriál.

Proposta ne’e aprezenta hosi Ministru Turizmu, Komérsiu no Indústria (MTKI), Lucas da Carmo da Silva.

“Komisaun ne’e iha misaun halo koordenasaun no analiza pareser no estudu multidisiplinár ne’ebé presiza halo redasaun ba projetu no polítiku sira ho objetivu kriasaun, instalasaun no operasionalizasaun parke industriál,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu ne’e iha Palásiu Governu, kuarta ne’e.

Portavós Governu ne’e akresenta, komisaun ne’e importante atu asegura implementasaun no kondusaun parte ezekutivu ba programa harii parke industriál ho objetivu atu lori liután investimentu sira mai iha Timór.

Parke industriál ne’e hanesan mós zona industriál, ne’ebé la’ós hanesan parke jardín ida.

Hafoin membru KM rona aprezentasaun no halo apresiasaun, iha vontade boot atu kolabora hamutuk ho Ministériu Turizmu, Komérsiu no Indústria (MTKI) atu avansa lalais programa refere.

Tanba ne’e ezekutivu sira deside katak matéria ba proposta ne’e hafoin rona aprezentasaun natón, bele hatuur tuir despaisu Primeiru-Ministru ne’ebé la presiza atu halo tuir rezolusaun KM nian.

“Signifika katak bainhira Konsellu Ministru halo apresiasaun ba proposta refere, maka iha ona inisativa harii parke industriál ne’ebé lidera hosi Ministru Turizmu, Komérsiu no Indústria, ne’ebé sei hato’o filafali ba Xefe Governu atubele halo despaisu ida atubele harii no formaliza komisaun koordenasaun téknika ne’e,” governante ne’e esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here