Vise Ministru Komérsiu no Industria, Domingos Lopes Antunes. Imajen Tatoli/Antónia Gusmão

DILI, 07 jullu 2020 (TATOLI) – Vise Ministru Komérsiu no Industria, Domingos Lopes Antunes, hateten ministériu ne’e iha ona planu atu estabelese parke industriál iha Munisípiu Liquiçá, tanba ne’e iha enkontru informál ohin entre Primeiru-Ministru (PM), Taur matan Ruak iha Palásiu Governu, Xefe Governu husu atu aselera prosesu estabelesimentu parke industriál.

“Ami iha tempu loron 100, hahú husi simu pose tanba prioridade ministériu nia iha industria maka oinsá atu aselera prosesu implementasaun parke industria ne’ebé sai mós planu Governu nian, ne’ebé sei estabelese iha área Liquiçá,” relata Vise-Ministru Domingos Lopes hafoin enkontru ho Primeiru-Ministru (PM), Taur Matan Ruak iha Palásiu Governu, tersa ne’e.

Governante ne’e dehan, tanba planu ne’e hanesan prioridade ba VIII Governu maka enkontru ohin Xefe Governu husu atu aselera prosesu nune’e bele ajuda industria ki’ik sira.

Notísia Relevante: Reuniaun Ordinária CAFI Aprova Projetu Estudu Viabilidade Parke Industriál

Iha reuniaun ne’e, Vise-Ministru simu orientasaun polítika husi PM Taur hodi hala’o serbisu di’ak liután no ko’alia mós kona-ba orgánika ministériu ne’e hafoin restante Membru Governu simu pose.

Antes ne’e iha novembru 2019, liuhosi reuniaun estraordinária Konsellu Administrasaun Fundu Infraestrutura (CAFI, sigla portugés) aprova ona proposta Ministériu Turizmu, Komérsiu no Industria (MTKI) liuhosi Diresaun Jerál Industria atu halo estudu viabilidade ba parke industriál iha rai ektare 64 iha área Suku Vatuvou, Postu Administrativu Maubara, Munisípiu Liquiçá.

Governu konsidera parke industriál ne’e atu fasilita investidór internasionál no nasionál atubele loke fábrika iha Timor-Leste hodi fó servisu ba timor-oan sira no sei konstrui hanesan fatin sentrál ida ne’ebé mak iha sítiu refere investidór sira sei asesu ba rai, bee inklui eletrisidade.

Tuir planu,  konstrusaun ba parke indústria ne’e ho orsamentu millaun $15, maibé sei la’o hela iha diskusaun nia laran, ne’ebé bele aumenta no bele hamenus.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here