Plenária Parlamentu Nasionál. Imajen Tatoli/António Gonçalves.

DILI, 13 jullu 2021 (TATOLI)—Reprezentante povu iha uma fukun Parlamentu Nasionál, aban (kuarta, 14/07) sei hala’o eleisaun hodi hili membru efetivu no suplente ba Komisaun Nasionál Eleisaun (CNE-sigla portugés).

Vise-Sekretáriu Parlamentu Nasionál, Deputadu António Nobre Tilman, hateten iha reuniaun líder bankada parlamentár ba loron ohin (tersa, 13/07) deside mekanizmu ba prosesu eleisaun iha plenária.

Notísia Relevante: PPN husu bankada parlamentár konsensu promove feto sai membru CNE

“Mekanizmu eleisaun ne’e tuir sitema proporsionalidade ne’ebé aprezenta ona lista kandidatu hosi bankada FRETILIN, CNRT no PLP, maibé la taka dalan ba bankada parlamentár sira seluk atu aprezenta sira-nia kandidatu. Entaun, aban avansa ho lista rua, ida proporsionalidade (membru efetivu sira) no eleisaun mós suplente sira-ne’ebé sei aprezenta hosi bankada sira seluk,” Vise-Sekretáriu ne’e informa ba Agência TATOLI, tersa ne’e.

Tanba tuir lei númeru 5/2006, 28 dezembru (alterasaun seidauk promulga hosi Prezidente Repúblika) kona-bá órgaun administrasaun eleitorál, Parlamentu Nasionál iha membru tolu ba CNE ho mandatu tinan neen (6).

“Ohin, ami hetan konsensu ida katak lista ne’ebé aprezenta hosi bankada sira seluk ne’e ita avansa ba suplente nian. Aban sei iha eleisaun dala-rua, ida eleisaun ba lista proporsionalidade kona-ba membru efetivu no ida seluk eleisaun ba suplente sira-ne’ebé mai hosi bankada haat seluk,” nia dehan.

Bankada haat ne’e kompostu hosi Partidu Demokrátiku (PD), Kmanek Haburas Unidade Nacional Timor Oan (KHUNTO), Frente-Mudança (FM) no Uniaun Demokrátika Timorense (UDT).

Tuir lista ne’ebé Agência TATOLI asesu iha Parlamentu Nasionál katak, Bankada FRETILIN propoin Alcino de Araújo Báris (atuál prezidente CNE), Bankada CNRT propoin Odete Maria Belo (atuál komisária CNE) no Bankada PLP propoin José Agostinho Belo (atuál komisáriu CNE).

Entretantu, Bankada Partidu Demokrátiku (PD) propoin José Pedro Camões (advogadu), Bankada KHUNTO propoin Querubin Jong Ferreira, Bankada Frente-Mudança (FM) propoin Fátima Sarmento Ximenes, nu’udar membru Konsellu Pedagójiku no Sientífiku iha DLP, Bankada Uniaun Demkorátika Timorense (UDT) propoin Octavio Manuel da Costa Amaral (advogadu).

Entretantu lista membru ne’ebé dezigna ona hosi órgaun kompetente ba CNE mak hanesan Prezidente Repúblika nomea ona Olávio da Costa Monteiro de Almeida nu’udar membru efeitivu ba CNE no Detaviana Madalena Guterres Freitas, nu’udar membru suplente. Ne’e previstu iha dekretu Prezidente Repúblika númeru 41/2021, 1 jullu.

Carlito Martins nomea hosi Governu nu’udar membru efetivu no Elvino Bonaparte do Rêgo, nu’udar membru suplente (karta ofisiál haruka iha loron 9 jullu 2021).

Purtantu Majistradu judisiál Antonino Gonçalves eleitu nu’udar membru efetivu no João Ribeiro nu’udar suplemente, ne’e dezigna hosi Tribunál Rekursu, ne’ebé haruka iha loron 30 juñu 2021.

Majistradu hosi Ministériu Públiku, Domingos Barreto eleitu nu’udar membru efetivu no Napolião Soares da Silva nu’udar membru suplente (karta ofisiál haruka iha loron 5 jullu 2021).

Bazea ba lei órgaun administrasaun eleitorál katak, Prezidente Parlamentu Nasionál mak sei fó pose hafoin dezignasaun.

Notísia Relevante: Governu nomea Carlito Martins no Elvino Bonaparte nu’udar membru CNE

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here