Plaka CNE. Imajen TATOLI/Francisco Sony

DILI, 07 jullu 2021 (TATOLI)–Governu liuhosi reuniaun Konsellu Ministru, nomea Carlito Martins nu’udar membru efetivu no Elvino Bonaparte do Rêgo nu’udar membru suplente Komisaun Nasionál Eleisaun (CNE, sigla portugés).

Proposta nomeasaun membru CNE na’in-rua ne’e aprezenta hosi Ministru Administrasaun Estatál, Miguel Pereira de Carvalho.

“Membru CNE nomeadu ba mandatu tinan-lima, renova ba dala-ida de’it no mantein nia funsaun to’o pose membru foun,” Ministru Prezidénsia Konsellu Ministru, Fidelis Manuel Leite Magalgães, hateten, hafoin reuniaun ezekutivu iha Palásiu Governu, kuarta ne’e.

Antes ne’e, Prezidénte Repúblika, Francisco Guterres ‘Lú Olo’, nomea ona Olávio da Costa Monteiro de Almeida ba membru efetivu no Detaviana Madalena Guterres Freitas nu’udar membru suplente CNE.

Notísia relevante: Xefe Estadu nomeia membru CNE

Knaar CNE mak superviziona atus eleitorál sira ba orgaun soberania ho baze eletiva, orgaun reprezentativu poder lokál, orgaun suku no referendu.

Komisaun ne’e kompostu hosi membru dezignadu hosi orgaun soberania, hosi Ministériu Públiku, Defensoria Públika, konfisaun relijioza no organizasaun reprezentantiva hosi feto.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here