Sekretária Meza Parlamentu Nasionál, Deputada Lídia Norberta dos Santos Martins,

DILI, 09 jullu 2021 (TATOLI)—Sekretária Meza Parlamentu Nasionál, Deputada Lídia Norberta dos Santos Martins, hateten Prezidente Parlamentu Nasionál (PPN) Deputadu Aniceto Longuinhos Guterres Lopes, husu bankada parlamentár sira halo konsensu propoin feto ida reprezenta uma fukun ba Komisaun Nasionál Eleisaun (CNE-sigla portugés).

Nia hatutan, iha reuniaun líder bankada parlamentár ba loron ohin, Prezidente Parlamentu Nasionál informa ba bankada sira hatama ona lista kandidatura maibé laiha kandidata feto.

Notísia Relevante: Governu nomea Carlito Martins no Elvino Bonaparte nu’udar membru CNE

“Kandidata feto laiha, só iha de’it kandidata feto ida hosi bankada Frente-Mudança (FM). Nune’e, Prezidente Parlamentu Nasionál husu atu bankada parlamentár sira halo konsensu, halo negosiasaun ba malu, nune’e iha duni proporsionalidade feto ida, mane rua ba membru CNE nian,” Deputada Lídia Norberta dos Santos Martins, informa ba jornalista sira, iha uma fukun, sesta ne’e.

Tuir Lei Órgaun Administrasaun Eletiorál, artigu 5 kona-ba kompozisaun define katak ema na’in-tolu sei nomea hosi Parlamentu Nasionál ba CNE ho mandatu tinan-neen.

Entre ema na’in-tolu ne’e, Prezidente Parlamentu Nasionál hakarak ida tenke feto hodi reprezenta órgaun fiskalizadór ba iha CNE.

Portavós Parlamentu Nasionál ne’e seidauk bele pronúnsia lista kandidatura hosi bankada parlamentár sira maibé sei fó-sai tempu ne’ebé opurtunu.

Notísia Relevante: Xefe Estadu nomeia membru CNE

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here