Sekertáriu Estadu Komunikasaun Sosiál (SEKOMS), Merício Juvinal dos Reis “Akara”, lansa livru "Politik Berdarah Timor-Leste” no “Lalehan Tanis" iha Salaun Centro Nacional Chega (CNC), sesta (09/07). Imajen Tatoli/Francisco Sony.

DILI, 09 jullu 2021 (TATOLI)—Sekretáriu Estadu Komunikasaun Sosiál (SEKOMS), Mericío Juvinal dos Reis “Akara”, sesta ne’e lansa livru “Politik Berdarah Timor-Leste” no “Lalehan Tanis” ne’ebé eskritór timor-oan Elidio Agusto Guterres hakerek.

Mericio Juvinal dos Reis Akara hateten, produsaun livru rua ne’e di’ak ona maibé presiza halo kle’an liután iha aspetu sira seluk, no sujere tenke hakbesik ba Ministériu Edukasaun Juventude no Desportu (MEJD) atu prodús livru sira-ne’e barak liután, nune’e estudante sira bele asesu.

Notísia Relevante: Eskritór timoroan hetan apresiasaun hosi impresaun “Jendela Sastra Indonesia”

Sekertáriu Estadu Komunikasaun Sosiál (SEKOMS), Merício Juvinal dos Reis “Akara”. Imajen Tatoli/Francisco Sony.

“Ha’u sujere hakbesik ba MEJD, iha posibilidade bele halo barak no prodús barak liután, atu nue’e estudante sira iha eskola bele asesu ba livru refere,” Merício Juvinal dos Reis hateten iha serimónia lansamentu livru ‘Politik Berdarah Timor-Leste’ no ‘Lalehan Tanis’, iha salaun konferénsia Centro Nacional Chega (CNC), Antigu Komarka, Balide, Dili.

Livru ‘Politik Berdarah Timor-Leste’ haktuir kona-ba istória funu no konflitu entre partidu polítiku ne’ebé akontese iha Timor-Leste iha 1974 to’o 1975, ne’ebé hakerek bazea ba estudu krítiku filozófiku ho teoria rekuñesimentu Axel Honneth.

“Bainhita ita hakerek uza filozofia, ha’u hakarak tebes no halo ánaliza. Ha’u sujere para uza teória filozofia atu haree kle’an liután ba problema nia abut tanba filozofia hanorin atu haree sasán la’ós haree iha leten de’it maibé haree to’o klean,” nia dehan.

Governante ne’e enkoraja juventude no estudante filozofia sira ne’ebé tuir lansamentu ne’e atu aprende filozofia tanba filozofia mós hanorin ema atu hatene problema no dudu ema atu sai autór ba mudansa no transformasaun.

Entretantu kona-ba livru ‘Lalehan Tanis’, Governante ne’e haktuir hanesan livru antolojia istória-badak ne’ebé la sees hosi realidade tanba livru ne’e hakerek bazea ba istória real (la’ós fiksaun) funu iha Timor-Leste, no halo krítika sosiál ne’ebé bele inspira aspetu hotu-hotu.

Iha fatin hanesan, Eskritór livru ‘Politik Berdarah Timor-Leste’ no ‘Lalehan Tanis’, Elidio Agusto Guterres, hateten objetivu lansa livru ne’e atu dezenvolve istória funu Timor-Leste nian ba ema hotu liu-liu ba joven sira atu hatene no eprende.

Eskritór livru “Politik Berdarah Timor-Leste” no “Lalehan Tanis”, Elidio Agusto Guterres. Imajen Tatoli/Francisco Sony.

“Ha’u-nia objetivu prinsipál mak ha’u hakarak dezenvolve ita-nia istória rasik. Livru ne’e ha’u hakerek, nu’udar joven ida, ha’u tenke hatene ha’u-nia istória rasik. Depois hakerek realidade Timor-Leste nia konflitu entre partidu iha tinan 1974-1975 ho teória rekuñesimentu Axel Honneth,” nia hateten.

Tuir teori rekuñesimentu Axel Honneth no Habermas hateten, konflitu ho sosiedade iha komunikasaun tanba antes iha komunikasaun tenke iha rekoñesimentu entre sujeitu, tanba polítika no konflitu entre partidu polítika sira iha tinan 1974-1975 ne’e laiha rekoñesimentu.

“Ba ha’u, impase polítika parte ida hosi laiha rekoñesimentu entre partidu, líder, no seluk tan. Nune’e, ba ha’u, funu 1974-1975 ne’e hanesan ‘Politik Berdarah Timor-Leste’ tanba povu barak mak mate ba funu ne’e,” nia dehan.

Aleinde ne’e, nie dehan, livru ‘Lalehan Tanis’ hanesan leituras (sastra) ida-ne’ebé iha laran ne’e ko’alia kona-ba istória iha 1975-1999 ne’ebé mosu inimigu oho timor-oan, abortu, ema oho an no problema sosiál seluk tán.

Livru ne’e tau titulu ‘Lalehan Tanis’ tanba funu ne’ebé akontese iha 1975-999 ne’e, lalehan nu’udar inan ida-ne’ebé sai sasin hodi haree realidade violasaun direitu umanu ne’ebé akontese iha Timor-Leste hosi oho ema, torturasaun, ema lakon ne’e mak naran lalehan tanis.

Livru ‘Politik Berdarah Timor-Leste’ ne’e iha pájina hamutuk 200 no livru ‘Lalehan Tanis’ (antolojia istória-badak no poezia) ho nia pájina hamutuk 120 ne’ebé emprime iha grafika Jendela Sastra Indonesia (JSI) iha Jogjakarta-Indonézia.

Livru ‘Politik Berdarah Timor-Leste’ hakerek ho dalen málaiu (Bahasa Indonesia), no revizór ba livru ne’e hosi Ekipa Grafika Jendela Sastra Indonesia (JSI) ho ninia Lian Makloke hakerek hosi Martinho da Silva Gusmão.

Entretantu jornalista TATOLI, Cancio ”Cassimata” Ximenes, mak kontribui sai revizór ba livru ‘Lalehan Tanis’. Livru ‘Polítika Berdarah Timor-Leste’ faan ba funsionáriu sira ho folin $20 no ba estudante sira $15, no livru ‘Lalehan Tanis” faan ba $12,50.

Notísia Relevante: Foho Taroman Habahat “Suara di Balik Kaca” iha Indonézia

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here