Prezidente Repúblika, Francisco Guterres Lú Olo, hasai retratu hamutuk iha serimónia despedida Atleta timor-oan ba partisipa iha Jogu Olímpiku Japaun, iha Palásiu Prezidensiál Nicolau Lobato, Bairru Pite, Dili, sesta, (09/07). Imajen Tatoli /Egas Cristovão.

DILI, 09 jullu 2021 (TATOLI)—Prezidente Repúblika, Francisco Guterres Lú Olo, enkoraja atleta timor-oan na’in-tolu (3) ne’ebé reprezenta Timor-Leste tuir jogu olímpiku iha Tokyo-Japaun atu haktuir bei’ala sira hodi kompete ho aten-brani no neon-metin.

Notisia Relevante: Atleta natasaun na’in-rua kontinua treinu molok partisipa iha Olímpiku Japaun

“Ha’u enkoraja ita-boot sira atu haktuir ita-nia bei’ala sira. Katak, sei kompete ho aten-barani no neon-metin, ho forsa vontade maka’as, determinasaun no persisténsia,” Prezidente Republika hateten iha ninia diskursu iha serimónia despedida atleta timor-oan ba Jogu Olímpiku Tokyo 2021, iha Palásiu Prezidensiál Nicolau Lobato, Bairru Pite, Dili, sesta ne’e.

Partisipasaun atleta timor-oan iha Jogu Olímpiku ne’e fó ona orgullu no onra boot ida ba Timor-Leste, no bele hatudu ba mundu katak nasaun ki’ik ida hanesan Timor-Leste bele mós kompete iha nível internasionál.

“Karik, Ita-Boot sira manán medalla ruma, sei fó onra boot liután ba Timor-Leste. Tanba, tuir Pierre Coubertain hateten, importante liu la’ós manán maibé kompete ho dignidade,” Xefe Estadu hateten.

Prezidente Repúblika enkoraja atleta hirak ne’e tanba sira sei reprezenta Timor-Leste no sei kompete ho atleta sira seluk hosi rai oioin, entaun knaar ida-ne’e la’ós fasil ba atleta sira atu kompete.

Tanba ne’e, Xefe Estadu fó parabens no susesu ba doben atleta Imelda Felicyta Ximenes Belo, Felisberto de Deus no José João Viegas da Silva, ba sira-nia partisipasaun iha Jogu Olímpikus ida-ne’e.

“Foin ba dahuluk mak Timor-Leste partisipa iha modalidade natasaun ka nani na’in-rua (2), Imelda Felicyta Ximenes hosi munisípiu Baucau no José João Viegas da Silva hosi Munisipiu Ermera. Atleta Felisberto de Deus, hosi munisípiu Ermera, sei kompete iha modalidade atletizmu,” nia hateten

Xefe Estadu saúda atleta sira-ne’ebé sei partisipa iha Jogu Olímpiku ne’ebé sei realiza iha 23 jullu to’o 08 agostu 2021 iha Tokyo-Japaun, tanba atleta Timor-Leste sei ba kompete ho nasaun 206 no sei kompete iha modalidade 46.

Prezdente Repúblika hato’o agradesimentu espesiál tebes ba apoiu tomak hosi Japaun, liuhosi Embaixada Japaun iha Dili, hodi asegura atleta Timor-Leste nia partisipasaun iha eventu importante ida-ne’e.

Notísia Relevante: Embaixada Japaun iha Dili oferese resepsaun Tokyo Olympics Games

Agrdese mós ba apoiu hosi eis Embaixadór Japaun ba Timor-Leste, Iwao Kitahara, no mós hosi Ina City ne’ebé sei garante akomodasaun no dezlokasaun ba Timor-Leste nia atleta sira durante Jogu Olímpiku iha Tokyo-Japaun.

Fundadór Komité Olímpiku Internasionál, Pierre Coubertain, fó motivasaun katak ema bele mós eduka ema liuhosi desportu, liu-liu haree ba eventu ida hanesan Jogu Olímpiku nu’udar instrumentu ida atu povu sira hakbesik-an ba malu hodi hametin dame.

“Timor-Leste no Japaun sai hanesan ezemplu di’ak ida kona-ba oinsá povu rua hakbesik-an ba malu,” nia hateten.

Iha tinan 2000, Timor-Leste partisipa ba dahuluk iha Jogu Olímpiku akontese iha Sydney, Austrália, no Jogu Olímpiku daruak hala’o iha Rio de Janeiro, Brazil, iha tinan 2016.

Notísia Relevante: Semana ne’e, FATL halo promosaun ba atleta Felisberto de Deus

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here