BAUCAU, 22 juñu 2021 (TATOLI)–Treinadór Federasaun Natasaun Timor-Leste (FNTL), Manuel Belo da Silva, hateten atleta natasaun na’in-rua, José Joao Viegas da Silva (Joe) no Imelda Felycita Ximenes Belo, sei partisipa kompetisaun Olímpiku 2021 iha Japaun.
Nia esplika, prosesu preparasaun durante fulan-tolu liuhosi treinu, hahú iha fulan-abríl 2021 to’o inísiu fulan-jullu, hanesan dadeer no lorokraik foku ba tékniku nani hamutuk item 2.000.
“Molok atleta partisipa kompetisaun Olímpiku iha Japaun, preparasaun ne’e akontese iha dadeer no lorokraik sempre treinu hanesan workout, ne’ebé atleta sira sempre kumpre tuir, ami prepara ona hanesan foku ba ain, liman, iis, tékniku ba nani, no ami-nia preparasaun ba ida-ne’e,” Treinadór ne’e inforrma ba Agência TATOLI, iha fatin treinu Pescina villa antiga Baucau, tersa ne’e.
Maski Timor-Leste la’ós ketegoria profesionál nani no kondisaun ne’ebé ladún sufisiente, entaun durante faze preparasaun tuir kbiit ne’ebé iha, buka rasik ekipamentu inklui oinsá atu prepara hahán ne’ebé saudável.
“Buat sira ne’e pakote ida, tanba ne’e presiza atensaun hotu, maibé ho inkondisaun ne’ebé ami hasoru, entaun ami nafatin prontu prepara atleta atu kompete iha
kompetisaun Olímpiku,” nia akresenta.
Altleta Imelda iha esperiénsia tamba tuir treinu tékniku iha Tañapura durante tinan-ida no partisipa eventu internasionál sira iha nasaun li’ur hanesan Kompetisaun iha Budapeste, Asian indoor games, partisipa iha World Championship iha Korea, Xina, inklui Asean Games iha Palembang-Jakarta, Indonezia.
Enkuantu, Atleta Joe rasik, maski iha esperiénsia mínimu no treinu de’it iha rai-laran, maibé partisipa ona eventu internasionál iha Korea no nafatin haka’as-an inklui iha vontade atu aprende.
“Maski atleta na’in-rua mínimu prestasaun maibé pelumenus bele ba kompete iha nível internasionál,” nia hatutan.
Asosiasaun Natasaun Baucau ne’ebé iha atleta barak nafatin kumpre orientasaun hosi FNTL tuir kondisaun hodi fó apoiu durante faze preparasaun.
Tuir nia, laiha alvu atu sai kampiaun iha eventu internasionél ne’e maibé hanesan nasaun sente urgullu tamba kategoria natasaun bele partisipa ona iha olímpiku tinan 2021, ne’ebé sei realiza iha Japaun.
“Ha’u-nia esperansa mak sira la’ós prepara sai kampiaun ba Timor-Leste nian, maibé ha’u iha fiar katak sira sei sai hanesan treinadór ba Timor-Leste iha futuru,” nia tenik.
Atleta natasaun Joe no Imelda reprejznta Timor-Leste liuhosi FNTL, sei kompete iha kategoria universál kompostu hosi Atleta José João ho kategoria metru 50 no Imelda iha kategoria metru 50 ou 100.
Tuir planu, altleta inklui komitiva hosi Timor-Leste sei aranka ba Japaun iha loron 12 jullu 2021, ne’ebé antes kompetisaun hahú prepara treina ikus iha Japaun.
Jornalista : Natalino Belo
Editora : Julia Chatarina
