Primeira Sekretária Embaixada Japaun iha Timor-Lete, Seiko Toyama hala’o reuniaun kortezia ida ho estrutura Komité Olímpiku Nasional iha Dili, tersa (15/06). Imajen/Espesiál

DILI, 25 juñu 2021 (TATOLI) – Embaixada Japaun iha Dili, Timor-Leste, sesta kalan, oferese resepsaun Tokyo Olympics Games, hodi konvida Sekretariu Estadu Juventude no Desportu (SEJD), Abrāo Saldanha, Konfederasaun Desporto Timor-Leste (CDTL, sigla portugés), xefe delegasaun Timor-Leste ba Tokyo Olympics Games, atleta-sira no parte relevante seluk tan.

Imajen/Embaixada Japaun

Embaixadór Japaun iha Timor-Leste, Masami Kinefuchi, kontente no prontu simu delegasaun Timor-Leste nian iha Tokyo Olympics Games ne’ebé  nia serimónia abertura iha loron  23 jullu no enserramentu iha loron 08 agostu 2021.

“Japaun prontu simu delegasaun Timor-Leste nian iha eventu ne’e. Japaun kontente bainhira haree atleta Timor-oan ho bandeira Timor nian partisipa iha eventu internasionál ne’e,” Embaixadór Masami Kinefuchi hateten.

Sekretáriu Estadu Juventude no Desportu, Abrão Saldanha hatete, Timor-Leste orgullu tanba sei haruka delegasaun ki’ik ida hodi reprezenta Timor-Leste iha jogu internasionál Tokyo Olympics Games 2020.

“Maski pandemia global halo ita labele book-an, maibé ita servisu no esforsu hodi haruka delegasaun ki’ik ida hodi reprezenta Timor-Leste iha eventu internasionál ne’e,” Abrão Saldanha hateten liuhosi nia intervensaun iha eventu resepsaun Tokyo Olympics Games ne’e.

Nia informa, preparasaun Timor-Leste nian atu partisipa iha eventu ne’e hakat liu obstákulu oi-oin, liu-liu problema barak ne’ebé Governu atende iha rai laran no konsege rezolve delegasaun ki’ik ne’e ba partisipa iha eventu internasionál ne’e.

“Ha’u hein katak ita nia partisipasaun iha Tokyo Olympics Games sei la hatudu de’it kompromisu ida tan hosi ita-nia Governu, maibé sei lori ita-nia susesu atu hakat ba futuru nune’e bele dezenvolve di’ak liután,” Abrão Saldanha tenik.

Nia konsidera atleta Timor-oan hirak ne’ebé partisipa iha Tokyo Olympics Games sei sai hanesan Embaixadór bainhira hela iha Tokyo.

Iha fatin hanesan, Atleta Natasaun Imelda Felicita Ximenes Belo hateten, orgullu tebes bele reprezenta Timor-Leste ba iha jogu nivel as iha mundu ne’e.

“Ami sei hatudu prestasaun di’ak, ami ba lori Bandeira RDTL no sei hamorin ita-nia nasaun nia naran, hanesan SEJD hatete, durante ami hela iha ne’ebá sai hanesan embaixadór, ne’e motivasaun ida,” Imelda Belo hateten.

Iha loron 15 juñu ne’e, Embaixada Japaun nian iha Timor-Leste hala’o mós reuniaun kortezia ida ho estrutura Komité Olímpiku Nasional hodi diskute kona-ba preparasaun hirak ne’ebé mak presiza ba Timor-Leste ninia partisipasaun iha Tokyo Olympics Games.

Seiko Toyama, primeira sekretária Embaixada Japaun nian introdús Yu Yoshimori, ne’ebé mak sei atende delegasaun ne’e durante sira hela iha sidade Ina, nu’udar  uma-nain ofisial ba atleta Olímpiku sira hosi Timor-Leste.

Seiko Toyama introdús mós preparasaun ba treinamentu iha sidade Ina, Perfeitura Nagano, no boas vindas calorosas hosi Perfeito Takashi Shirotori husi Sidade Ina; Iwao Kitahara, eis Embaixadór Japaun nian mai Timor-Leste no populasaun sira iha sidade Ina ba delegasaun Olímpiku Timor-Leste nian.

Jornalista       : Hortencio Sanchez

Editór              : Francisco Simões

HAKEREK NO HATÁN

Please enter your comment!
Please enter your name here