Imajen/Media PR.

DILI, 06 jullu 2021 (TATOLI)—Reprezentante Povu iha Parlamentu Nasionál (PN), tersa ne’e aprova proposta-lei enkuadramentu orsamentál iha jeneralidade.

Notísia Relevante: Proposta-lei enkuadramentu orsamentál konsagra ho prinsípiu 11

Proposta-lei enkuadramentu orsamentu estadu no jestaun finanseira públika ne’e aprovadu iha jeneralidade ho rezultadu votasaun a-favór 37, kontra 12 no abstensaun 11.

“Nune’e proposta-lei enkuadramentu orsamentu estadu no jestaun finanseira públika pasa iha jeneralidade,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, Parlamentu Nasionál.

Hafoin votasaun iha jeneralidade, plenária halo votasaun dala-ida tán kona-ba proposta-lei ne’e haruka fila ba Komisaun C ne’ebé trata asuntu Finansa Públika hodi diskute kada artigu iha espesialidade, nune’e plenária fó autorizasaun ba Komisaun C ne’e aprovadu ho rezultadu votasaun a-favór 44, kontra 0 no abstensaun 17.

“Nune’e proposta-lei ne’e haruka ba Komisaun C hodi halo diskusaun iha epesialidade, plenária hein votasaun finál globál,” Aniceto Guterres hateten.

Governu liuhosi Ministériu Finansa propoin halo revizaun ba númeru 3/2009 kona-ba Lei Orsamentu no Jestaun Finanseira (LOGF-sigla portugés). Iha proposta-lei foun ne’e mantein artigu hamutuk 16, altera artigu hamutuk 22, retira artigu 17.

Entretantu proposta-lei foun ne’e aumenta tán artigu 61 kompara ho lei númeru 13/2009 nune’e proposta-lei foun ne’e iha artigu hamutuk 116 kompara ho artigu 55 iha lei vijente.

Preámbulu hosi proposta-lei foun ne’e ho objetivu prinsipál rua mak ajiliza (agilizar) iha jestaun públika no hasa’e transparénsia, responsabilidade, prestasaun konta, kontrolu serbisu no entidade sira iha setór públiku administrativu.

Ministru Finansa, Rui Augusto Gomes, esplika razaun halo revizaun tanba iha limitasaun no lákuna tanba ne’e mak iha propoosta-lei foun introdús prinsípiu 11 ne’e kompostu hosi unidade no universalidade, anualidade no plurianualidade, estabilidade no sustentabilidade orsamentál, prinsípiu efikásia ekonomia no efisiénsia, transparénsia, responsabilidade, ekidade interjerasionál, programasaun despeza, espesifikasaun no la kompensasaun.

Nia hatutan, perímetru orsamentál la’ós de’it iha retratu di’ak ida kompletu kona-ba despeza maibé atu redús despeza públika ba entidade sira-ne’ebé la inklui iha OJE atu nune’e entidade sira-ne’e bele moris mesak ka auto-sustentabilidade.

Nia dehan, elementu importante ida hosi proposta-lei mak previzaun orsamentasaun por programa, ne’ebé atu vinkula inskrisaun dotasaun ho atividade ne’ebé prevee ona iha planu anuál kada serbisu no entidade nune’e iha OJE la aprezenta de’it despeza maibé tenke hatene mós objetivu atu atinje ho despeza ne’ebé gasta.

“Ita sei halo kuandu ita reforsa ona relasaun planu no orsamentu maka sei fásil atu halo avaliasaun kona-ba efisiénsia no efikasia despeza públika no sei obriga servisu no entidade sira ne’ebé la kumpri objetivu sira ne’e,” nia ko’alia debate jeneralidade loron daruak, iha Parlamentu Nasionál.

Nia esplika, orsamentu ida presiza mantein ekilibru entre nesesidade transparénsia ho risku bainhira aprezenta informasaun barakliu, sei la inklui sub-programa hotu iha OJE atu evita dokumentu ne’e sa’e boot liután.

Ministru Finansa ne’e fó ezemolu, iha OJE 2021 aprezenta de’it programa no iha tabele 3 iha ona pájina 18, no lei ne’e rasik iha pájina 37, karik mak aumenta tán ho sub-programa maka tabela ne’e sei sa’e pájina 81 no lei ne’e rasik sei aumenta ba pájina 100.

“Ho orsamentasaun bazea ba programa ita sei uza orsamentasaun botton up no mós kombinasaun ho top down, botton up ida-ne’e katak dotasaun orsamentál bazea ba atividade sira-ne’ebé prevee iha planu anuál kada servisu no entidade,” nia dehan.

Ministru Rui Augusto Gomes, fó-sai katak Governu nakloke ba deputadu sira kona-ba karik iha proposta-alterasaun.

Deputadu Bankada Partidu Demokrátiku (PD), Mariano Assanami Sabino, konsidera proposta-lei ne’e importante iha konstrusaun estadu liuhosi ezekusaun orsamentál.

Deputadu Bankada Partidu Libertasaun Popular (PLP), Francisco de Vasconselos, esplika proposta-lei foun prinxe rekizitu formál, legál, rejimentál no konstitusionál.

Notísia Relevante: La kondiz ho situasaun atuál, Governu propoin halo revizaun LOGF

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here