Letra Braille.

DILI, 08 jullu 2021 (TATOLI)—Diretór Ezekutivu Asosiasaun Halibur Defisiente Matan Timor-Leste (AHDMTL), Gaspar Afonso, informa AHDMTL daudaun ne’e fó formasaun Letra Braille ba ema ho defisiénsia matan sira-ne’ebé maihosi munisípiu 12 inklui Rejiaun Administrativa Espesiál O’e-Cusse Ambeno (RAEOA).

Formasaun ne’e AHDMTL halibur ema ho defisiénsia matan sira mai hosi munisípiu maibé daudaun ne’e Munisípiu Manatutu ho RAEOA de’it mak seida’uk mai, maibé Ainaro, Aileu, Baucau, Bobonaro, Covalima, Liquiça, Lautém, Manufahi no Viqueque mak tuir hela formasaun refere.

Notisia Relevante: Iha Timor-Leste, membru AHDMTL hamutuk na’in-14.828

Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

“Objetivu halibur ema defisiénsia matan sira atu fó kapasitasaun liu-liu treinamentu ba Letra Braille. Letra Braille mak letra ne’ebé ba ema ho defisiénsia matan sira, oinsá bele hakerek no lee. Ne’e mak objetivu ida, halibur sira hosi munisípiu mai atu fó trainamentu ba sira, hodi hatudu ba sosiedade ba ita-nia rai, nasaun ida ne’e katak maske ema ho defisiénsia matan labele haree maibé sira-nia neon, sira-nia konsiénsia bele halo mós hanesan sidadaun sira seluk,” Gaspar Afonso hateten ba Agência Tatoli, iha nia knaar fatin, Manleuana, Dili, ohin.

Tanbá, nia dehan, ema defisiénsia matan sira hela iha komunidade no hela ho família hasoru estigma, injustisa sosiál iha sira-nia moris. Ho nune’e, asosiasaun ne’e hamriik atu akumula sira, hodi fó treinamentu ba sira oinsa bele uza materiál hanesan ricklet no styluss bele hakerek no lee.

Durante ne’e atividade ba formasaun ba Letra Braille suspende hela tanbá ligadu ho pandemia COVID-19 no Governu implementa serka sanitária no konfinamentu obrigatóriu. Maibé, iha fulan juñu atividade komesa hala’o fali ona maibé tuir nafatin protokolu hosi Ministériu Saúde no Organizasaun Mundiál Saúde nian.

Formandu sira-ne’ebé tuir formasaun kona-bá Letra Braille ne’e, hirak ne’ebé hatene hakerek no lee ona, tanba AHDMTL haruka sira ba eskola iha ensinu rekorrente iha Ministériu Edukasaun Juventude no Desportu (MEJD).

“Ita haruka sira ba eskola iha ensinu rekorrente maibé agora daudaun Timor-Leste ne’e eskola to’o de’it faze lima (5), hanesan level ho Pré-Sekundária. Ita sei luta hela para Governu atu estabelese mós faze neen (6), hanesan level Sekundária. Entaun, kuandu faze neen (6) iha ona sira ramata faze neen, hanesan sekundária, ita enkamiña sira ba Universidade Nasionál,” nia informa.

Aleinde ne’e, iha AHDMTL iha mós formasaun ba lian inglés, portugés, no agora daudaun AHDMTL sei buka hela ema atu fó treinamentu ba área komputadór ba ema defisiénsia matan sira, ho nune’e sira bele prepara sira-nia aan iha futuru.

Iha parte seluk, formanda defisiénsia matan, Lucia Fatima Lemos, sente sente kontente tanbá tuir formasaun iha AHDMTL bele aprende kona-bá Letra Braille no agora bele hatene ona hakerek naran no animál nia naran.

“Ha’u mai AHDMTL iha tinan 2019 to’o agora. Liu-liu iha formasaun ne’e, ha’u komesa hatene ona hakerek naran no animál nia naran. No iha ne’e, ami aprende uluk estrutruta (AHDMTL) sira-nia naran, dekor tiha, depois kontinua fali ba iha Braille Text, hodi hamamar liman hanesan hakerek no lee. Depois dekor tiha, kontinua tama fali ba hakerek ema-nia naran no animál nia naran,” nia informa.

Notisia Relevante: 2018-2020 defisiente matan 34 frekuenta estudu iha Ensinu Rekorrente

Entretantu, totál formadór ba formasaun ne’e hamutuk ema na’in sia (9), mesak ema ho defisiénsia matan. Ema defisiénsia matan ne’ebé tuir formasaun iha Asosiasaun Halibur Defisiente Matan Timor-Leste (AHDMTL) hamutuk ema na’in-39, kompostu hosi feto 25 no mane 14, hodi aprende Letra Braille.

Louis Braille

Loius Braille moris iha loron 04 janeiru 1809 iha Coupvray, sidade ki’ik-oan ida besik Paris. Nia hela hamutuk ho nia aman, Simon Rene Braille ho nia inan Monique hela iha uma simples ida.

Nia aman sapateiru ka halo sapatu, no sasán ka materiál mesak kulit atu halo ba sapatu, ne’ebé servisu iha ninia ofisina mekánika rasik. Louis Braille ki’ik-oan gosta tebes halimar iha nia aman nia ofisina.

Iha idade tinan haat (4), bainhira nia halimar namanas ho nia aman nia ekipamentu servisu sira, nia hetan asidente ida. Daun, sasán kro’at atu halo ko’ak kulit hodi halo sapatu, la sente hakanek ninia matan sorin. Infesaun iha ninia matan sorin ne’ebé kanek ne’e, nani-da’et ba ninia matan sorin seluk no afeta ba nia matan rua ne’e labele haree.

Maske matan labele haree, Louis Braille ki’ik-oan susesu hatudu ninia hakarak ne’ebé forte atu estuda no aprende. Louis nia inan-aman hamutuk ho profesór/a sira iha eskola, haree no deskobre Louis nia poténsialidade (matenek).

Bainhira Louis Braille halo idade tinan 10, nia hetan bolsa estudu ba eskola ka estuda iha Royal Institution for Blind Youth iha Paris, hanesan Institutu edukasaun espesiál ba labarik defisiénsia matan sira.

Istória Letra Braille

Istória Letra ka kode Braille hahú iha 1821. Iha tempu ne’ebá, Kapitaun Forsa Armada Franca ho naran Charles Barbier, vizita Louis Braille nia eskola fatin. Kapitaun Barbier halo aprezentasaun ba saida mak nia deskobre ne’ebé nia hanaran ”Nigth Writing”.

Night Wraiting hanesan kode ida-ne’ebé posivelmente guia ninia tropa sira iha informasaun segredu iha kampu batalla la presiza ko’alia ba malu maibé halakan de’it lampda atu lee situasaun sira. Kode ne’e kompostu hosi pontu 12 ne’ebé iha kombinasaun atu reprezenta letra sira no bele sente hosi liman fuan ida-nia tutun bainhira lamas kona kode ne’’e.

Deskobrimentu Letra Braille

Kode ne’e defisil tebes ba Kapitaun Barbier ninia tropa sira entaun ema hotu rezeita au uza formalmente iha sira-nia ekipa, maibé ba estudante ema defisiénsia matan ho otas 12, Louis Braille, ne’e la’ós buat defisil ida.

Louis Braille sente katak sistema pontu hirak ne’e fó benefisiu bainhira nia susesu simplifika sasán ne’e. Hafoin Kapitaun Barbier nia vizita ne’e, nia sériu esperimenta hodi rezulta Sistema pontu “mosu” ne’ebé diferensa.

Iha tinan tolu (3) nia laran, bainhira nia halo idade 15, to’o ikus nia susesu dezenvolve sistema ideal ida-ne’ebé agora hanaran Letra Braille, uza selula ida iha pontu neen (6) no bazea ba ortografia normál.

Iha kada karáter ka selula Braille kompostu hosi pozisaun pontu neen (6). Pozisaun pontu ida-ne’e forma iha “espasu” rua ne’ebé kada “espasu” ida iha pozisaun pontu tolu iha “espasu” rua ne’ebé kada espasu iha pozisaun pontu tolu, entaun forma “kuadradu”. Hafoin ne’e, Louis Braille deskobre kombinasaun 63 ne’ebé bele “mosu” ka bubu sa’e.

Iha tinan 1829, Louis Braille prodús livru Method of Writing Words, Music and Plain Song by Means of Dots, for Use by the Blind and Arranged by Them, hanesan livru braille primeiru ne’ebé emprime iha mundu ne’e.

Iha 06 janeiru 1852, iha ninia idade 43, Louis Braille kuñesidu hanesan deskobrimentu letra ka kode Braille ne’e mate tanba moras TBC.

Iha 1869, Dr. Thomas Armitage lidera grupu ema defisiénsia matan harii instituisaun ida atu dezenvolve, promove no habelar Sistema deskobrimentu Louis Braille hanaran Letra Braille.

Grupu ki’ik-oan ne’e moris no buras sai Royal National Institue of the Blind (RNIB), ne’ebé agora kuñesidu hanesan imprezau grafika boot liu ne’ebé emprime livru kona-ba Braille iha Europa. Deskobrimentu brillante Louis Braille halo tiha ona mudansa iha “mundu lee” no “mundu hakerek” ba ema ho defisiénsia matan ba nafatin.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here