Diretór ezekutivu AHDMTL, Gaspar Afonso. Imajen espesial.

DILI, 04 fevereiru 2021 (TATOLI)— Durante tinan 2018 to’o 2020, Asosiasaun Halibur Defisiénsia Matan Timor Leste (AHDMTL) integra ema ho defisiénsia matan hamutuk na’in 34 ba Eskola Ensinu Rekorrente hodi hetan sertifikadu liuhosi ezame ekivalénsia.

Notísia Relevante:2021, ADMTL sei rekolla dadus kona-ba defisiénsia matan iha TL

Diretór ezekutivu AHDMTL Gaspar Afonso informa, maluk defisiente matan na’in 34 ne’e kompostu hosi feto na’in 21 no mane na’in 13.

“Molok integra Ita-nia maluk defisiente matan sira ne’e ba Ensinu Rekorrente, ami kapasita uluk sira oinsá koñese letra braille, nune’e bele fasilita sira iha prosesu ensinu aprendizazen,” Gaspar Afonso  hateten ba jornalista Agência Tatoli, kinta (04/02).

Oras ne’e daudaun, na’in 14 akaba ona ensinu báziku terseiru síklu, na’in 13 foin mak atu hahú eskola ensinu báziku primeiru no segundu síklu no na’in 7 kontinua ona ba universidade.

Alende ne’e, iha na’in 3 mak kontinua ona sira nia estudu iha Universidade Nasionál Timor Lorosa’e (UNTL) Fakuldade Siénsia Sosiál iha Unidade Inkluzaun Sosiál komunitária ne’ebé iha ona semester 6, no na’in 4 seluk foin mak halo inskrisaun iha tinan ne’e atu asesu ba UNTL.

Gaspar Afonso husu Governu atu prepara profesór espesífiku iha ensinu rekorrente atu nune’e bele atende maluk defisiente sira iha prosesu aprendizazen.

Nia mós iha esperansa katak, Governu sei kria polítika ida hodi ratifika konvensaun direitu ba ema ho defisiénsia, nune’e bele fasilita liutan partisipasaun ema ho defisiénsia iha aspetu hotu-hotu.

Tuir dadus sensu uma-ka’in Timor-Leste 2015, rejista sidadaun ho kondisaun defisiénsia hamutuk 38.118, no hosi númeru ne’e iha 25.000 mak seidauk asesu ba edukasaun.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here