Ambiente kongresu AHDMTL. Imajen/Osória Marques.

DILI, 14 agostu 2020 (TATOLI)–Diretór Ezekutivu Asosiasaun Halibur Defisiente Matan Timor-Leste (AHDMTL), Gaspar Afonso hatete, daudaun ne’e membru defisiente matan ne’ebé hamahan-aan iha AHDMTL hamutuk 256 no membru sira iha territóriu Timor-Leste ne’e hamutuk 14.828.

Notísia Relevante: Primeiru-Ministru motiva no enkoraja AHDMTL atu kria banku

“Ha’u-nia membru AHDMTL ne’ebé mak hamahon-aan iha AHDMTL hamutuk 256 maibé iha territóriu Timor laran tomak membru AHDMTL hamutuk 14.828,” dehan Gaspar Afonso, ba Agência TATOLI, foin lalais ne’e.

Maski iha membru barak, nia informa, tuir realidade to’o oras ne’e organizasaun Asosiasaun Halibur Defisiente Matan Timor Leste (AHDMTL) nia fatin rasik laiha hodi bele fasilita defisiente matan sira-nia atividad no daudaun ne’e fatin iha Tibar maibé rai mamuk hela.

Tanba ne’e, nia haktuir, AHDMTL koopera hamutuk ho Embaixada Japaun atu bele hetan fundu hodi konstrui sentru treinamentu no ho dormitóriu para bele halibur membru AHDMTL sira iha Timor-Leste bele asesu ba formasaun ho di’ak no dignu. 

Loloos ne’e, nia haktuir, konvensaun direitu ba ema ho defisiénsia nian ne’e bandu ida-ne’e maibé situasaun iha Timor-Leste seidauk permite atu eduka ema ho defisiénsia sira ho independente.

“Iha realidade ne’ebé mak akontese mak hanesan ita-nia motorista bainhira ema ho defisiénte sira atu sa’e krareta no dehan ba sira katak sira tún iha RTTL nia sorin atu ba tuir ezame iha eskola rekorente nian maibé saida mak akontese ba ita-nia maluk defisiente sira. Motorista sira hatún fali iha dalan no fatin seluk,” nia hateten. 

Ho kestaun ne’e, Gaspar Afonso hateten, luta Timor nian seidauk hotu tanba atinjementu seidauk másimu. Tanba, tuir nia, AHDMTL sei kontinua esforsu hodi buka fatin ba membrusira hodi hela no asesu ba formasaun liga ba ema ho defisiente matan sira.

Nia informa, tanba ho razaun hirak ne’e mak AHDMTL hala’o kongressu konsellu fiskál 2020-2025 hodi hametin estrutura AHMDTL atu hala’o servisu ho trasparansia no onestu. 

“Ita atu hametin ita-nia boa governasaun ida forte no estrutura forte, hodi nune’e ema parseiru sira labele iha dúvida. Tanba ami hakarak halo servisu ho tranparánsia, justu no onestu,” Gaspar Afonso hateten. 

Entretantu, Prezidente Fiskál AHDMTL, Jacinta da Cruz, relata kongresu AHDMTL nian ba loron tolu ne’e, hetan suporta orsamentu hamutuk $3,550 ne’ebé hosi Plan Internasionál Timor Leste ho nia montante rihun $1, Gabinete Inspesaun Jerál (GIG) ho montante rihun $1, Gabinete Espoza Prezidente Repúblika mak rihun $1, Organizasaun APHEDA ho montante $500, hosi Embaixada Filipina $50, no osan hirak ne’e mak halo preparasaun hosi inisíu to’o realizasaun kongresu ne’e.

Aleinde ne’e, nia informa, GIG ho Timor Furak mós ajudu materiais hanesan banner, Loja Starking ho W-Four oferese bebida midar, rental Klakfuik Becora ajuda karta produsaun ba kongresista nian,

“Ho ida ne’e, ami agradese ba ema hirak ne’e nia ajudu no suporta hanesan materiais no finanseira hodi ami prepara no to’o ohin loron ami bele realiza ami-nia atividade kongressu ba board foun ba 2020-2025 nian,” nia dehan. 

Jornalista : Osória Marques

Editór      : Cancio Ximenes  

HAKEREK NO HATÁN

Please enter your comment!
Please enter your name here