Primeiru-Ministru, Taur Matan Ruak, konvoka enkontru ho entidade iha área infraestrutura, iha Palásiu Governu, kuarta (07/07). Imajen TATOLI/Francisco Sony

DILI, 07 jullu 2021 (TATOLI)-Ministériu Obra Públika (MOP), Salvador Eugênio dos Reis Pires, hamutuk ho entidade iha área infraestrutura sira, aprezenta planifikasaun projetu infraestrutura tinan 2022 ba Primeiru-Ministru (PM), Taur Matan Ruak.

“Primeiru-Ministru bolu mai, hamutuk ho insititusaun públiku no empreza estatál sira atu atualiza servisu ne’ebé mak la’o iha 2021 nian no ko’alia oituan kona-ba planu atividade sira iha programa orsamentu 2022 nian,” Ministru Salvador informa hafoin reuniaun ho PM iha Palásiu Governu, Dili, kuarta ne’e.

Ministru Obra Públika, Salvador Eugênio dos Reis Pires. Imajen TATOLI/Francisco Sony

Ba kestaun ne’e, MOP seidauk iha serteza projetu infraestrutura hira mak sei implementa iha 2022 tanba sei iha faze planifikasaun.

“Ami atualiza kontinuasaun programa sira ne’ebé ita hala’o iha setór bee, eletrisidade no atividade Institutu Jestaun no Ekipamentu, Institutu Públiku (IGE, I.P, sigla portugés) ne’ebé sei kontinua presta servisu iha tinan 2021,” nia akresenta.

Projetu infraestrutura reál ne’ebé hala’o ona iha tinan 2021, área eletrisidade loke ona konkursu públiku ba eletrisidade pakote 34 ne’ebé lansa ona no augustu lansa fali pakote foun atu kompleta suku 76 ne’ebé seidauk asesu eletrisidade ho kustu millaun $12.

Notísia relevante: Empreza 167 iha interese konkorre projetu instala eletrisidade pakote 30

MOP no Eletricidade de Timor-Leste, Empreza Públika (EDTL, E.P) diskute ona ho Ministériu Finansa, hamutuk ho parseiru dezenvolvimentu sira atu halo dijitalizasaun ba liña distribuisaun, atu mellora di’ak fornesimentu eletrisidade ba komunidade sira no fásil kontrola avaria ho kustu estimasaun millaun $50 no planu klasifikasaun uza gazodutu ba sentrál elétrika sira hodi poupa orsamentu.

Prezidente Konsellu Administrasaun IGE, I.P, Ermenegilda da Costa Laurentina. Imajen TATOLI/Francisco Sony

Iha área bee-moos, Bee Timor-Leste, Empreza Públika (BTL, E.P)  finaliza ona planu mestre bee no saneamentu ba munisípiu Dili, Baucau, Lautém, Same, Viqueque, Manatuto inklui Rejiaun Administrativu Espesiál Oé-cusse Ambeno (RAEOA).

Iha Manatuto no RAEOA nia projetu integradu kompletu ona no agora BTL, E.P foku ba operasaun no manutesaun de’it iha munisípiu Buacau, Viqueque, Lautém no Same, ne’ebé iha prosesu dezeñu atu lori ba faze konstrusaun.

Kustu estimasaun ba projetu ne’e mai hosi fundu impréstimu hosi Banku Mundiál no Banku Dezenvolvimentu Aziátiku inklui fundu hosi Governu Timor-Leste hamutuk millaun $90.

“Ita mós iha projetu melloramentu bee ba postu administrativu 35 no seluk iha faze planifikasaun. Ita mós implementa  projetu rekuperasaun ekonómika, ne’ebé BTL, E.P hahú loke konkursu públiku ba melloramentu drenajen iha Dili no kanál intersepsaun atu satán bee bainhira udan,” nia hatutan.

Iha área estrada, MOP selebra ona karta aseitasaun ho empreza manan-na’in hamutuk 22, ba konkursu públiku estrada rurál ba dezenvovlimentu (ERD) iha munisípiu Ainaro, Baucau, Dili, Mantuto no Viqueque no ba munisípiu hitu seluk sei iha prosesu konkursu públiku.

Notísia relevante: MOP Asina Karta Aseitasaun ho Empreza Konsultória Hamutuk 17

Orsamentu ba projetu estrada rurál iha munisípiu lima ne’e hamutuk millaun $8, ho durasaun tinan-ida, hahú hosi 2021 to’o 2022.

Iha orsamentu Jerál Estadu (OJE) 2021, Governu aloka millaun $49, ne’ebé millaun $35 mai hosi Fundu Infraestrutura no millaun $13 hodi liña ministeriál atu halo reabilitasaun no manutesaun estrada rurál.

Vise-Ministru Obra Públika, Nicolau Lino Freitas Belo. Imajen TATOLI/Francisco Sony

Aleinde ne’e, Iha faze ezbosu dezeñu detalladu finál ba projetu 35 kompostu hosi estrada nasionál 13, ponte 10, planu mestre bee-moos neen, planu mestre ba Hospitál Nasionál Guido Valadares (HNGV) no Ospitál Lahane, estudu ba zona ekonomia Baucau no Batugade, sidade Universitáriu inklui revitalizasaun Aitra-laran, Dili.

Ba projetu hamutuk 35, kompostu hosi estrada, ponte, reviltalizasaun Aitarak-laran, estudu viabilidade polo dezenvovlimentu rua.

Governante ne’e haktuir, iha enkontru, IGE relata atividade normalizsaun no abertura estrada foun sira, melloramentu ba rebeira sira inklui planu preparasaun ba normalizasaun tanba tempu udan besik ona.

“Ami hahú identifika rebeira sira ne’ebé hanesan sai pontu krítiku ba inundasaun atu halo normalizasaun molok udan monu rai hodi prevene inundasaun,” nia afirma.

Reuniaun ne’e patisipa hosi Vise-Ministru Obra Públika, Nicolau Lino Freitas Belo, Prezidente Konsellu Administrasaun IGE, I.P, Ermenegilda da Costa Laurentina, Prezidente Konsellu Aministrasaun BTL, E.P, Carlos Peloi dos Reis, no Vise Prezidente Konsellu Administrasaun EDTL, E.P.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here