Traballadór EDTL halo instalasaun eletrisidade iha área Comoro, kinta (04/03). Imajen TATOLI/António Gonçalves

DILI, 22 juñu 2021 (TATOLI)-Empreza nasionál hamutuk 167 hatudu interese sosa dokumentu konkursu públiku ne’ebé Eletricidade de Timor- Leste, Empreza Públika (EDTL, E.P) lansa ona faze dahuluk projetu instalasaun eletrisidade hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu.

“Ita-nia empreza hamutuk 167 mak mai ona sosa dokumentu sira iha Diresaun Nasionál Aprovizionamentu (DNA), ne’ebé hahú aban termina ona,” Prezidente Konsellu Administrasaun EDTL, E.P, Paulo da Silva, informa ba Agência TATOLI, iha ninia knaar fatin, Caicoli, Dili, tersa ne’e.

Empreza Estatál ne’e, hahú 01 juñu 2021 loke ona konkursu públiku ba empreza nasionál sira ne’ebé iha interese bele foti dokumentu (kópia PDF iha CD) iha edifísiu Caicoli, ne’ebé kandidatu interesadu sira sei sosa $100 cash ka depózitu iha banku no hato’o aplikasaun ba enderesu.

EDTL, E.P antes ne’e halo konferénsia prévia iha loron 10 juñu 2021, tuku 15:00 iha salaun reuniaun EDTL, E.P, Caicoli kona-ba kestaun konkursu.

“Ita-nia empreza sira ne’ebé sosa ona dokumentu sira, hahú aban (23/06) tenke vizita lokál, hafoin sira prepara proposta hodi hatama ba ekipa aprovizionamentu EDTL, E.P nia atu halo selesaun ka avaliasaun,” nia akresenta.

Tuir Diretór ne’e, empreza sira ne’ebé sosa ona dokumentu konkursu, obrigatóriamente vizita lokál ne’ebé sira konkorre atu halo proposta no prepara dokumentu hodi submete ba Diresaun Aprovizionamentu.

EDTL, E.P lansa konkursu públiku distribuisaun instala eletrisidade hamutuk pakote 34, maibé pakote haat sei toma konta hosi empreza estatál ne’e rasik, ne’ebé tama pakote manutesaun iha Dili laran, nune’e lansa pakote 30 ba públiku atu kompañia privada sira bele kompete.

Pakote 30 instalasaun eletrisidade foun iha munisípiu Ermera hanesan suku Laclo bá Ailacu-Atsabe, suku Obulu to’o Nunumea, suku Parami to’o Aci, EBF Era- ulo to’o sede suku Era-ulo, Letefoho, suku Humboe to’o aldeia Hatali.

Munisípiu Bobonaro mak hanesan aldeia Haelesu to’o Nunudoi, Atabae no suku Zoiloho to’o Gudo, Lolotoe.

Enkuantu, munisípiu Manufahi hanesan suku Tateker to’o Weberek Alas, Aldeia Daor, Dalun no Tutuluro, suku Daisua too Gruto, suku Aitemua, Mindelo no Turiscai, suku Bernama to’o suku Liurai no munisípiu Ainaro hanesan iha suku Raibere to’o Soru-kraik.

Nune’e mós, munisípiu Viqueque mak iha aldeia Samarago to’o suku Waibobo tuan, suku Lekibuti to’o Nahareca, suku Tagaba, Dasinaha Dalirisi to’o sede suku Uabobo, suku Abana to’o Watumaluli, suku Lalabu, Builo to’o Abana, suku Abana to’o suku Lekibuti no suku Waiulaek, Buareca to’o suku Ossoroa. Aleinde ne’e, iha munisípiu Covalima iha suku Fohorem Vila to’o suku Lactos, suku mape, Irsai to’o suku Ucecai.

Munisípiu Manatuto iha suku Tasi fatin to’o suku Fatumakerek-Soibada, munisípiu Liquiçá iha suku Kutulau, suku Baura to’o Buku Mera, Bazartete. Munisípiu Dili mak hanesan suku Beloi, suku Ili Timur to’o Makadade, suku Villa Maumeta to’o Beloi no suku Maumeta to’o suku Makili, Ataúro.

Munisípiu Baucau iha suku Loilubo to’o suku Osawala I, Vemasse, suku Maluro to’o suku Darasula, Quelicai, inklui munisípiu Maliana iha suku Memo to’o Saburai.

Orsamentu ba projetu eletrifikasaun iha suku 76 ne’ebé seidauk asesu eletrisidade hamutuk millaun $12, ne’ebé prevee ona iha orsamentu tinan ne’e.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here