iklan

NASIONÁL, EKONOMIA, HEADLINE

MOP Asina Karta Aseitasaun ho Empreza Konsultória Hamutuk 17

MOP Asina Karta Aseitasaun ho Empreza Konsultória Hamutuk 17

MOP selebra kontratu no entrega karta aseitasaun ba kompañia manan-na’in hamutuk 17. Imajen/Florencio Miranda Ximenes

DILI, 24 fevereiru 2020 (TATOLI) – Ministériu Obra Públika (MOP), selebra asinatura no entrega karta aseitasaun ba kompañia manan-na’in hamutuk 17 ne’ebé atu halo estudu viabilidade no dezeñu detalladu ba projetu.

Projetu induviduál ho pakote hamutuk 17, ne’ebé finaliza ona Komisaun Nasionál Aprovisionamentu (CNA-sigla portugés) kompostu husi estudu viabilidade no dezeñu detalladu ba estrada ho ponte 13, estudu viabilidade no dezeñu ba Ospitál haat, no estudu viabilidade ba Sidade Universitáriu Aileu.

“Projetu konkursu públiku ba estudu viabilidade no dezeñu detalladu ne’e husi Orsamentu Jerál Estadu (OJE) 2019, ba pakote ponte 10 no estrada munisípiu 12, estudu hanesan abitasaun Aitarak-Laran nian, planu mestre ba Ospitál Nasionál Guido Valadares (HNGV-sigla portugés) inklui ospitál António Carvallo Lahane no no Sidade Universitáriu Aileu”, Tenik Ministru Obra Públiku, Salvador Eugénio Saores dos Reis Pires, hafoin ramata seremónia iha Rai-Kotu, Comoro, segunda ne’e.

Governante ne’e dehan, razaun MOP hakarak loke konkursu públiku ba faze estudu viabilidade no dezeñu detalladu maka atu bele investiga risku sira hodi garante kualidade obra.

“Ita haree kustu estudu no dezeñu ne’e karun liu fali, maibé ita tenki halo estudu no dezeñu atu Governu investe ne’e tenki ho kuallidade liuhosi empreza konsultóriu sira”, Ministru Salvador akresenta.

Tuir nia, polítika Governu liuhosi MOP loke konkursu públiku atu prevene bainhira projetu la’o mak hadi’a fali ho kustu adisionál husi kapitál investimentu.

Ho nune’e, Salvador hato’o felisitasaun ba empreza konsultóriu vensedór, ba apoia tékniku ho di’ak hanesan parseiru dezenvolvimentu ba Governu hodi hala’o dezenvolvimentu iha nasaun ne’e.

Iha fatin hanesan, Diretór Jerál Obra Públika, Rui Hernani, enkoraja empreza konsultóriu sira atubele halo jestaun di’ak durante fulan-lima nia laran hodi hala’o estudu viabilidade no dezeñu detalladu.

Nune’e mós, Diretór Finansa no Administrasaun MOP, Januário Patrício Barbosa, iha kompañia hamutuk 48 mak tuir konkursu públiku, maibé na’in-18 mak sai vensedór.

Empreza nasionál hamutuk 16 no empreza internasionál ne’ebé halo konsórsiu hamutuk rua mak tuir konkursu públiku, no hahú serbisu iha loron 5 jullu to’o 31 dezembru 2019, ho kustu orsamentu $9.754.781.

“Ita entrega karta aseitasaun bainhira empreza sira aseita hotu-hotu sei lori hatama ba banku hodi sai gatantia, hafoin lori mai asina kontratu ho MOP bele halo ona mobilizasaun atu bá serbisu iha terenu”, nia informa.

Ho nune’e, Dirijente ne’e dehan bainhira konsultóriu 18 ne’e finaliza estudu viabilidade no dezeñu detalladu iha tinan ne’e (2020), iha tinan oin bele loke konkursu públiku ba konstrusaun fíziku ba projetu hirak ne’e.

Loke Konkursu Públiku ba Peojetu ho Pakote 217

Liuhosi Orsamentu Estadu 2020, MOP liuhosi Diresaun Nasionál Aprovizionamentu konsege loke konkursu públiku ba projetu hamutuk 217.

Konkursu públiku 217 ne’e kompostu husi projetu Request for Quotations (RFQ) hamutuk 78, National Competitive Bidding (NCB) 95, International Competitive Bidding (ICB) ualu, Fixed Budget Selection (FBS-study) hamutuk 21 no Restrict Tendering Procedure (RTP) hamutuk ualu ho sira seluk ne’ebé sei iha preparasaun dokumentu.

Iha faze konstrusaun fíziku mak hanesan estrada rurál ho pakote 48, manutensaun rutina estrada nasionál sira pur volta pakote 24 no ba projetu bee-moos kuaze hamutuk 50-resin ne’ebé sei halo mobilizasaun hahú novembru, inklui projetu ki’ik balun.

Orsamentu ba konkursu ne’e, MOP prevee iha OJE 2019, iha bens servisu hamutuk $128.457-resin, iha kapitál menór hamutuk millaun $4,7-resin, iha kapitál dezenvolvimentu iha millaun $15-resin inklui millaun $1 ba transferénsia publika.

Konkursu estudu viabilidade no dezeñu detalladu hamutuk 22, kompostu husi estrada nasionál pakote 12 no ponte pakote 2, ne’ebé ho kada pakote ponte 5, inklui mós estudu husi planu urbanu nian hanesan estudu ba konstrusaun Ospitál Lahane, Ospitál Nasionál Guido Valadares, revitalizasaun Aitarak-Laran no polu dezenvolvimentu Baucau ho Batugade.

Nune’e, MOP mós prevee estudu viabilidade no dezeñu detallada iha tinan-2019 hamutuk millaun $12, inklui estudu planu mestre ba bee-moos no sanitasaun iha kapitál munisípiu 6 hanesan Aileu, Ainaru, Bobonaro, Covalima, Ermera no Liquiçá.

Jornalista: Florencio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!