Prezidente RAEOA, Arsénio Paixão Bano, lansa vasina Sinovac doze dahuluk iha Pante Makasar. Imajen Tatoli/Abilio Elo Nini.

OÉ-CUSSE, 07 jullu 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarta ne’e ofisiálmente lansa vasina Sinovac doze dahuluk ba sidadaun xineza 65 no timor-oan 135, nomós vasina AstraZeneca ba komorbilidade idade 60 iha sub-rejiaun sira.

Notísia Relevante: RAEOA simu tan AstraZeneca vial 475-Sinovac vial 200

“Ha’u hanoin, importante ba ita Oé-Cusse simu vasina Sinovac no simu mós AstraZeneca. Tanba, autoridade no ita hotu nia hakarak to’o tinan ida-ne’e nia rohan maizumenus populasaun Oé-Cusse barak mak hetan ona vasina, nune’e ita bele proteje-an,” Autoridade RAEOA hato’o lia hirak ne’e iha serimónia lansamentu vasina Sinovac doze dahuluk nian ne’ebé hala’o iha edifisiu saúde Rejionál suku Costa, sub-rejiaun Pante Makasar, kuarta ne’e.

Oé-Cusse-oan tenke proteje-an hosi moras COVID-19, tanba agora virus variante Delta COVID-19 ne’e halo situasaun iha Indonézia mós defisíl tebes, entaun di’ak-liu Atoni-oan hotu-hotu tenke simu vasina tanba vasina Sinovac no vasina AstraZeneca ne’e hanesan de’it.

Tanba, nia esplika, Guvernu simu vasina AstraZeneca no Sinovac ne’e ho objetivu ida atu populasaun sira iha territóriu nasionál bele simu vasina no proteje-an hosi moras COVID-19 ne’e, tanba moras ne’e perigu ba ema-nia moris.

Entretantu Sekretáriu Rejionál Asuntu Saúde, Manuel da Costa hateten loron ohin RAEOA ofisiálmente halo lansamentu vasina Sinovac ba sidadaun xineza sira iha Oé-Cusse hamutuk 65 nomós Atoni-oan sira hamutuk 135, tanba vasina Sinovac ne’ebé RAEA simu hosi Guvernu sentrál ne’e hamutuk 200 vial (frasku).

Vasina AstraZeneca mós hanesan programa kontinuasaun ba grupu trajetu komorbilidade ho idade 60, ne’ebé fó prioridade liu ba iha área fronteira hanesan sub-rejiaun Oésilo, Pasabe no Baoknana inklui zona Pante Makasar nian

Vasina Sinovac doze dahuluk ne’e, ninia durasaun implementasaun ne’e domingu haat (4) de’it no tuir planu doze daruak nian sei hala’o iha fulan-agostu.

Notísia Relevante: Populasaun RAEOA 6.091 simu ona vasina AstraZeneca

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here