Prezidente Autoridade Rejiaun Administrativa Espesiál Oé-Cusse Ambeno (RAEOA), Arsenio Paixão Bano, no Sekretáriu Rejionál Asuntu Saúde, Manuel da Costa, simu vasina AstraZeneca no vasina Sinovac hosi Governuu Sentrál. Imajen Tatoli/Abilio Elo Nini.

OÉ-CUSSE, 01 Jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), kinta ne’e simu tan vasina AstraZeneca vial (frasku) 475 ho vasina Sinovac vial 200 hosi Guvernu sentrál

Sekretáriu Rejionál Asuntu Saúde Rejiaun Administrativa Espesiál Oé-Cusse Ambeno (RAEOA), Manuel Da Costa, hateten RAEOA simu vasina ne’e sei kontinua fó vasina AstraZeneca ba populasaun 5.700 no vasina Sinovac ne’e autoridade RAEOA sei konsulta ho nasionál molok halo vasinasaun.

Notísia Relevante: Autoridade RAEOA: Oé-Cusse tenke livre hosi COVID-19

“Ohin, ita simu vasina rua, vasina AstraZeneca kuantidade ne’e iha vial (frasku) 475 ba ema na’in 5.700 no vasina Sinovac iha vial 200 ne’’e ba ema na’in-200. Agora, ba vasina AstraZeneca ne’e, ita kontinua fó vasina ba idade komorbilidade ba idade 60 ba leten. Entretantu, vasina Sinovac ne’e ita sei konsulta nasionál, nune’e bele fó vasina ba populasaun sira,” Manuel Da Costa hateten hafoin simu vasina hosi reprezentante Ministériu Saúde, iha Aeroportu Rota do Sandalo, bairru Palaban, suku Costa,  sub-rejiaun Pante Makasar, Oé-Cusse.

Entretantu Prezidente Autoridade RAEOA, Arsénio Paixão Bano, hato’o agradesimentu ba Guvernu sentrál liuhosi Minísterio Saúde (MS) tanba bele tulun tan povo Oé-Cusse hodi distribui vasina AstraZeneca no Sinovac ba sira-ne’ebé atu simu doze dahuluk nian.

“Ha’u hakarak hato’o obrigado ba Guvernu sentrál liuhosi Ministério Saúde servisu hamutuk ho SAMES, ohin distribui tan vasina AstraZeneca ho vasina Sinovac mai povo Oé-Cusse. Ne’e benefísiu ba ema na’in 5.700 iha Oé-Cusse,” Arsénio Paixão Bano hateten.

Notísia Relevante: PA RAEOA apela ba Atoni-oan apoiu Guvernu kombate COVID-19

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here