Ministru Finansa, Rui Augusto Gomes. Imajen TATOLI/Egas Cristóvão

DILI, 05 jullu 2021 (TATOLI)—Governu liuhosi Ministériu Finansa (MF) propoin ba Parlamentu Nasionál (PN) atu halo revizaun ba Lei Orsamentu no  Jestaun Finanseira (LOGF, sigla portugés) tanba konsidera la kondiz ona ho situasaun atuál.   

Nune’e, Ministru Finansa, Rui Augusto Gomes, aprezenta Proposta-Lei foun hanaran Lei Enkuadramentál Orsamentál hodi substitui lei númeru 13/2009 kona-ba LOGF, ne’ebé tama ona iha debate jeneralidade.

“Daudaun ita aplika Lei númeru 13/2009 ne’ebé uza kuaze tinan 12 ona maibé seidauk halo alterasaun substansiál, situasaun ohin loron la hanesan ho situasaun tinan 10 liubá. Lei Enkuadramentu Orsamentál ne’ebé vigora tenke sai elementu fasilitadór iha jestaun finanseira, la’ós sai obstákulu ba Estadu atu halo ninia funsaun, tanba ne’e presiza kurije limitasaun no fó biban ba Estadu ezekuta Orsamentu Jerál Estadu (OJE) iha ninia totalidade,” Ministru Finansa fundamenta razaun propoin halo revizaun ba lejizlasaun ne’e, durante debate faze jeneralidade iha sala planária, segunda ne’e.

Aleinde ne’e, liuhosi rejime orsamentál no jestaun finansa públika, Governu halo esforsu ho intensaun atu provoka kreximentu no dezenvolvimentu ekonómiku.

Nune’e, iha programa VIII Governu Konstitusionál introdús reforma fiskál finansa públika, ne’ebé sai prioridade ba deversifikasaun finanseira área reseita no despeza, mellora aprovizionamentu no fortalese desentralizasaun finanseira inklui orsamentasaun bazeia ba programa.

Tanba ne’e, tuir Ministru, elementu prinsipál hosi jestaun finansa públika maka halo revizaun ba lei númeru 13/2009, loron 21 outubru kona-ba LOGF.

Lejizlasaun ne’e konsagra ba dahuluk iha ordenamentu jurídiku Timor-Leste, rejime jurídiku OJE no normál sira ne’ebé regula ezekusaun orsamentál no jestaun finansa públika.

“Lei ida-ne’e hanesan marka importante ida iha istória Timor-Leste, hafoin tinan 10 ho lejizlasaun finanseira Nasaun Unida ka UNTAET nian,” nia hatutan.

Sai instrumentu mellora jestaun finansa públika

Antes ne’e, iha tinan 2011 iha alterasaun kiik tanba aprovasaun Lei Orgánika Kámara Konta, ne’ebé hato’o rekomendasaun atu hadi’a prosesu orsamentál.

“Proposta-lei foun atu sai instrumentu mellora jestaun finansa públika, nune’e alkansa estabilidade makro orsamentál ba kurtu no médiu prazu. Nune’e mós, bele sai instrumentu ne’ebé permite alokasaun di’ak liu ba rekursu limitadu, hadi’a difisiénsia despeza, hadi’a jestaun kaixa no kualidade informasaun,” nia tenik.

Ho hanoin hirak ne’e, Governu hanoin limitasaun no lakuna iha Lei númeru 13/2009 ne’ebé vigora durante tinan 12 tenke muda tanba la kondiz ona ho situasaun atuál.

“Lakuna ida maka laiha kualkér obrigasaun programasaun pluri-annuál, maibé lei ne’e prevee regra orsamentasaun bazeia ba programa, enkuantu lei númeru 13/2009 hetan aprovasaun molok Rejiaun Administrativa Espesiál Oé-cusse Ambeno (RAEOA) no Seguransa Sosiál estabelese,” nia dehan.

Lejizlasaun ne’ebé propoin halo revizaun, la prevee kualkér komponente planeamentu la prevee regra orsamentál, únika norma kona-ba orsamentál ne’ebé prevee iha Lei númeru 13/2009 mak data aprezentasaun proposta OJE.

Maski regra ezekusaun OJE ne’ebé lei prevee maka avizu kona-ba autorizasaun despeza, regra alterasaun OJE ne’ebé prevee iha lei númeru 13/2009 maibé la adapta ho orsamentu bazeia ba programa, la estabelese reseita jerál no reseita própriu, la estabelese regra tranzisaun saldo, no lei ne’e mós la estabelese regra kona-ba restitiuisaun reseita kobrada individamente ka repozisaun despeza paga individamente.

Nune’e, alterasaun rejime jurídiku OJE no jestaun finansa públika hanesan oportunidade di’ak ida atu inkorpora mellora prátika internasionál ne’ebé relasiona ho orsamentasaun no transparénsia.

Jornalista : António Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here