Abertura enkontru jerál ne’ebé hala’o iha Salaun Enkontru Sekretáriu Rejionál Administrsaun Numbei, suku Costa, sub-rejiaun Pante Makasar. Imajen Tatoli/Abilio Elo Nini.

OÉ-CUSSE, 29 Juñu 2021 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), tersa ne’e realiza enkontru ho líder komunitáriu no jestór sub-rejiaun sira hodi halo avaliasaun ba progresu servisu ba implementasaun programa prioridade sira iha baze.

Prezidente Autoridade RAEOA, Arsénio Paixão Bano, hateten programa prioridade prinsipál liu ne’ebé mak líder komunitária no jestór sub-rejiaun sira tenke tau iha konsiderasaun no servisu hamutuk hodi kombate COVID-19 katak rai Oé-Cusse tenke livre hosi moras COVID-19.

Notísia Relevante: PA RAEOA apela ba Atoni-oan apoiu Guvernu kombate COVID-19

“Programa prioridade liu mak Oé-Cusse tenke livre hosi COVID-19,” Arsénio Paixão Bano hateten iha abertura enkontru jerál ne’ebé hala’o iha Salaun Enkontru Sekretáriu Rejionál Administrsaun Numbei, suku Costa, sub-rejiaun Pante Makasar.

Atu kombate COVID-19, nia dehan, Autoridade RAEOA servisu hamutuk ho líder komunitária ni liíder sub-rejiaun sira halo sensibilizasaun ba populasaun atu labele halo transaksaun ilegál iha área fronteira no polítik estabelesimentu kuarentena iha sub-rejiaun hotu hodi prevene transmisaun komunitária.

Prezidente Autoridade RAEOA, Arsénio Paixão Bano. Imajen Tatoli/Abilio Elo Nini.

Prezidente autoridade ne’e hateten, programa importante seluk mak autoridade RAEOA sei rezolve problema bee-moos iha Oé-Cusse, kontinua mellora estrada foun sira iha área rurál, preparasaun edifisiu kuuerentena ba tempu naruk ne’ebé bele nakfilak ba fasilidade postu saude no sentru saúde, no programa kona-ba edukasaun no elektrisidade

Iha biban ne’e, Sekretáriu Rejionál Asuntu Administrasaun RAEOA, Martinho Abani Elo hateten lidér komunitáriu sira atu uza oportunidade ne’e nu’udar meiu komunikasaun ida atu levanta isu ka problema no rekomendasaun ba autoridade atu nune’e bele implementa iha baze.

“Iha enkontru ne’e, ita halo avaliasaun kona-bá peogresu no dezafiu ne’ebé autoridade lokál sira hala’o iha baze tanba ita lidér autoridade lokál sira mak atende servisu iha nivél hot-hotu iha sub-rejiaun ida-idak, hodi bele hato’o preokupasaun no sejestaun nune’e saida mak persiza hadia liu-liu infraestrutura bázika nian iha suku no aldeia,” Martinho Abani hateten

Nune’e autoridade lokál sira iha sub-rejiaun Nitibe deklara ofisiálmente katak perfurasaun sistema bee-moos iha Noa-Ana ho Suni-Ufe fó ona benefísiu direta ba populasaun sira iha fatin refere.

Jestor sub-rejiaun Nitibe, Manuel Tolan, hato’o agradesimentu ba autoridade RAEOA tanba tinan ne’e halo projetuu perfurasaun sistema bee-moos iha Noa-Ana ne’ebé populasaun sira asesu ona bee-moos ba moris loro-loron nian.

Perfurasaun Sistema bee-moos daruák, nai dehan, iha Suni-Ufe ne’e mós ajuda tebe-tebes komunidade sira tanba tinan hirak nia laran, akontese tempu bailoron naruk komunidade sira hakilar ba bee-moos maibé ho planu autoridade nian konsege rezolve komuniddae sira-nia preokupasaun ne’e.

Notísia Relevante: Arsenio Bano: “Ha’u-nia prioridade hakarak rezolve problema bee-moos iha Oé-Cusse”

Imajen Tatoli/Abilio Elo Nini.

Entretantu Xefe Suku Lela-Ufe, sub-rejiaun Nitibe, José Neno Sila, sente kontente tanba implementasaun planu prioridade autoridade RAEOA kona-bá bee-moos nian ne’e fó benefísiu no bele hakonu komunidade nia nesesidade ba bee-moos nian.

Totál benefisiáriu ba projetu perfurasaun sistema bee-moos iha Noa-Ana hamutuk aldeia tolu (3) hanesan aldeia Mahata, Kuat-Enas, no aldeia Nefolete ho totál uma kain 176 ho abitante hamutuk 1250, ho nia volume bee-moos 100 mil ho ekivalénsia 1000 mil litru ne’ebé fahe ba Tanke tolu (3)

Aleinde ne’e Xefe Suku Suni-Ufe, Crisanto Tamele, hateten bee-moos iha suku Suni-Ufe susar atu asesu, maibé nia parte iha ona esperansa tanba autoridade RAEOA hahú konstrui perfurasaun sistema bee-moos ida iha suku Suni-Ufe.

“Obra ne’e agora dadauk la’o hela iha ha’u-nia suku mak perfurasaun bee-moos iha suku Suni-Ufe. Ida-ne’e, ha’u nu’udar xefe suku agradese ba autoridade tanba bele konstrui perfurasaun bee-moos ba ha’u nia komunidade sira,” nia haktuir.

Total suku iha sub-rejiaun Nitibe hamutuk suku (5) hanesan, suku Usitaco, Suni-Ufe, Bene-Ufe, Lela-Ufe no suku Ban-Afi, ho totál populasaun tuir sensu uma kain tinan 2015 hatudu populasuan iha sub-rejiaun Nitibe hamutuk 12.273 ho uma kain 2.705.

Tanba ne’e, Prezidente Autoridade Rejiaun Administrativa Espesiál Oé-Cusse Ambeno (RAEOA), Arsenio Paixão Bano, hato’o agradese ba autoridade lokál no autoridade sub-rejiaun sira-nian atu servisu maka’as tanba Oe’Cusse tenke ba oin no atu ba oin tenke livre hosi COVID-19 mak bele dezenvolve RAEOA.

“Agradese tebes ba enkontru ohin, xefe suku no membru konsellu suku sira halo avaliasaun ida importante tebes, Ha’u hakarak ita hotu servisu maka’as tanba Oé-Cusse tenke ba oin. Atu ba oin tenke livre hosi COVID-19 mak foin ita bele ko’alia kona-bá dezenvolvimentu,” Arsenio Paixão Bano hateten.

Notísia Relevante: MOP RAEOA prevee rihun $42 mellora estrada foun iha Oésilo

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here