Prezidente Autoridade RAEOA, Arsénio Paixão Bano, simu vasina AstraZeneca doze daruak. Imajen Tatoli/Abilio Elo Nini.

OÉ-CUSSE, 22 Juñu 2021 (TATOLI)—Prezidente Autoridade (PA) Rejiaun Administrativa Espesiál Oé-cusse Ambeno (RAEOA), Arsénio Paixão Bano, apela ba Atoni-oan sira atu apoiu Guvernu kombate COVID-19 liu-hosi simu vasina AstraZeneca doze daruak, atu nune’e bele livre hosi moras COVID-19 no livre halo sirkulasaun

Notísia Relevante: “Proteje aan hosi moras COVID-19, proteje Timor-Leste”

“Oé-Cusse iha kedas fronteira, ne’e últimu rekursu ita tenke halo ba Timor-Leste. Se bainhira ita Oé-Cusse-oan mak vasina hotu, entaun ita garante sei laiha transmisaun lokál, transmisaun komunitaria ne’e hatudu mai ita katak bele livre hosi máskara hanesan nasaun sira seluk. Ha’u hakarak Oé-Cusse tenke livre, tanba iha Dili komesa tun no di’ak fali ona. Kazu tun maka’as depois vasina ne’e hahú. Hetok ema simu vasina barak, transmisaun mós hetok tun maka’as,” Arsénio Bano apela ba Atoni-oan sira iha serimónia lansamentu vasina doze daruak ne’ebé realiza iha suku Abani, aldeia pasabe, sub-rejiaun Pasabe, tersa ne’e

Autoridade RAEOA ne’e hateten, tuir medida ezekusaun estadu emerjénsia no dekretu lei ne’ebé Governu aprova ona katak bainhira sidadun ida iha sertifikasaun simu ona vasina doze daruak (kompleta) bele livre halo sirkulasaun sein halo teste.

Maske nune’e, nia husu nafatin ba Atoni-oan sira iha Dili ka fatin seluk ne’ebé hakarak fila-mai RAEOA ne’e iha obrigasaun tenke tuir teste swab antes halo viajen, nune’e bele evita transmisaun lokál no komunitaria.

Nune’e, nia apela ba Atoni-oan sira atu kontinua nafatin uza máskara no kumpre nafatin medida prevensaun COVID-19 nian, hodi proteje-aan no proteje sira seluk ne’ebé mak sedauk simu vasina ka foin simu vasina primeira doze.

“Favór, ita tulun RAEOA hanesan tulun-aan rasik. Tulun populasaun iha RAEOA hamutuk 8.5000 no tulun Timor-Leste,” nia dehan.

Tuir dadus ne’ebé Agência TATOLI asesu hosi Sekretáriu Rejiaun Asuntu Saúde, Manuel da Costa, iha tersa (22/06) ne’e hatudu katak, totál kazu positivu rejista iha RAEOA hamutuk ualu (8) no ema ne’ebé kumpre kuarentena obrigatóriu hamutuk ni’an-230.

Notísia Relevante: Idade 0-5 no adultu vasina kompleta livre sirkulasaun sein autorizasaun

Jornalista : Abilio Elo Nini

Editor       : Cancio Ximenes

HAKEREK NO HATÁN

Please enter your comment!
Please enter your name here