Imajen/Media PR.

DILI, 30 juñu 2021 (TATOLI)—Reprezentante povu iha uma fukun Parlamentu Nasionál, kuarta ne’e autoriza Prezidente Repúblika dekreta estadu emerjénsia (EE) ba dala-XV ba territóriu nasionál tomak tanba ho razaun situasaun kalamidade públika surtu COVID-19.

Renovasaun deklarasaun estadu emerjénsia ba dala-XV ne’e aprovadu ho rezultadu votasaun nominál a-favór 39, kontra 0 no abstesaun 20 nune’e autoriza Xefe Estadu sei dekreta estadu emerjénsia ba loron 30 tán, hahú hosi oras 00.00 iha loron 2 jullu 2021 (sesta-feira) no termina iha oras 23.59 loron 31 jullu 2021 (sábadu).

Notísia Relevante: KE-KSDS rekomenda ba PR husu PN renova Estadu emerjénsia

“Nune’e projetu-lei kona-ba autorizasaun deklarasaun estadu emerjénsia aprovadu, mundu tomak sei preokupa ho COVID-19 ne’ebé permanese ka persiste nafatin, maibé agora mosu tán ameasa foun hosi variante Delta no variante sira seluk. Situasaun hanesan ne’e obriga Timor-Leste atu prepara-aan oinsá moris hamutuk ho COVID-19. Ita fó fiar VIII Governu Konstituisionál atu implementa didi’ak estadu emerjénsia, hodi orienta no prepara povu tomak hasoru realidade foun,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Razaun Prezidente Repúblika husu autorizasaun ba Parlamentu Nasionál tanba situasaun COVID-19 iha Timor Osidentál (NTT-sila indonézia) konfirmadu kazu infesaun 18.053 no ema na’in-482 mak mate.

Razaun seluk tán mak oras ne’e mundu hasoru variante foun Delta COVID-19 ne’ebé oras ne’e alastra ona iha nasaun viziñu Indonézia.

Tanba ne’e, Timor-Leste tenke antesipa hodi halo prevensaun liuhosi medida sira hodi hasoru variante foun ne’e tanba rejista ona na’in-21 ne’ebé mate asosiada ho COVID-19, na’in 12 iha sentru izolamentu Vera Cruz inklui na’in-tolu (3) grave.

Mensajen Prezidente Repúblika Francisco Guterres ‘Lú Olo nian, propoin ba Parlamentu Nasionál atuhalo estensaun estadu emerjénsia  ba loron 30 tán iha territóriu nasionál ho parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun realizasaun selebrasaun relijioza.

Nune’e mós, suspende direitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada.

Entretantu direitu rezisténsia sei impede hosi autoridade públika bainhira sidadaun sira la kumpre medida ezekusaun sira.

Deklarasaun polítika hosi Bankada Partidu Libertasaun Populár (PLP) apoia nafatin renovasaun estadu emerjénsia ba loron 30 tán.

“Ami hosi Bankada PLP apoia nafatin renovasaun deklarasaun estadu emerjénsia, atubele hamutuk ho estadu ida-ne’e prevene no kombate moras COVID-19 no apela ba populasaun sira hotu ne’ebé seidauk vasina tenke hakbesik ba sentru saúde hodi simu programa vasinasaun tanba opsaun vasina AtraZeneca no Sinovac,” Reprezentante Bankada PLP, Deputada Maria Angelina Lopes Sarmento akresenta.

Purtantu Vise-Xefe Bankada Congresso Nacional de Reconstrução de Timorense (CNRT), Deputadu Patrocínio Fernandes dos Reis, konsidera Governu implementa EE durante ne’e hamosu reasaun oinoin hosi Povu tanba limite sidadaun sira atu hala’o atividade ekonómika no sósiu-kulturál, enkuantu atividade Governu bele halibur ema atus-ba-atus hodi kebra medida ne’ebé Governu rasik dekreta.

“Tanba-ne’e maka povu hatudu nia reasaun protesta, hodi nune’e ikus mai, balun tenke simu tuku-tebe, balun tán Polísia kaer hodi sulan iha sala detensaun. Situasaun ne’e ita tenke preokupa tanba Governu liuhosi Sentru Jestaun Krize hosi fulan-maiu to’o fulan-juñu massvamente rejista númeru kazu pozitvu Covid-19 sa’e maka’as ne’ebé espalla lalais iha territóriu laran tomak,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here