Koordenadór Estadu-Maiór Sala Situasaun-CIGC, Komodoro Donaciano Costa Gomes 'Pedro Klamar Fuik'. Imajen/IDN

DILI, 30 juñu 2021 (TATOLI)–Sala Situasaun, Sentru Integradu Jestaun Krize (CIGC, sigla portugés) rekomenda ba Governu atu kontinua suspende fronteira ba kualker via durante semana rua.

“Ita hatene variante delta oras ne’e sirkula iha Indonézia no Austrália, Sentru Integradu hanoin katak karik bele suspende entrada ema hotu ne’ebé mai ka tránzita hosi Indonézia, suspende entrada hosi fronteira terrestre, aérea no marítima durante loron 14, maibé mantein nafatin sirkulasaun sasán mai ita-nia rain,” Koordenadór Estadu-Maiór Sala Situasaun-CIGC, Komodoro Donaciano Costa Gomes ‘Pedro Klamar Fuik’, hateten, iha ámbitu diskusaun estensaun Estadu Emerjénsia ba dala-XV iha sala plenária, Parlamentu Nasionál, kuarta ne’e.

Tuir Koordenadór Estadu-Maiór, bainhira iha tendénsia COVID-19 ho variante foun sirkula iha rejiaun no mundu, to’o tama iha Dili, inisialmente sai episentru bele kontorna filafali ba tranzisaun.

Nia dehan, ho tranzisaun kazu pozitivu hosi munisípiu ida bá munisípiu seluk ka rai seluk mai rai-laran, halo CIGC iha hanoin katak presiza halo kuarentena loron 14 ba ema ne’ebé hetan ona vasina kompletu maibé foin mak tama Timor-Leste.

“Ami haree daudaun ita moris iha normalidade foun, iha ambiente transmisaun lokál no transmisaun komunitária ne’ebé konstitui nafatin risku eminiente transmisaun kazu pozitivu, liuliu ba ema ne’ebé maka seidauk vasina no seidauk infetadu nafatin iha posibilidade importasaun ilegál variante seluk hosi rai seluk mai ita-nia rain,” Komodoro akresenta.

Nune’e CIGC halo konkuzaun katak mantein medida sanitária ne’e importante atu halo kontensaun no mitigasaun di’ak iha sistema rai-laran no halo kuarentena no izolamentu, nune’e vasina nesesáriu ba ema hotu.

Notísia relevante: Governu manifesta ambisaun aumenta númeru vasina kada loron ema 10.000

Rekomenda mós atu mantein Serka Sanitária iha munisípiu Baucau no Dili tanba iha númeru kazu ativu a’as hanesan Dili konstitui kazu 414 ativu no Baucau ho kazu ativu 138.

“Kuandu situasaun normaliza oituan ita tama iha normalidade, ita bele filafali ba Ministériu Saúde atribui nafatin tarefa kombate COVID-19 ne’e ba iha ospitál referál no sentru saúde sira maka sei dezempeña funsaun hirak ne’e no dezenvolvimentu ekonómiku bele la’o filafali,” Koordenadór Estadu-Maiór hatutan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here