Ministra Saúde, Odete Maria Freitas Belo. Imajen Tatoli /Egas Cristovão

DILI, 01 jullu 2021 (TATOLI)— Ekipa saúde halo hela investigasaun hodi buka hatene loloos kona-bá abitante Hilária de Jesus, ne’ebé hakotu-iis hafoin simu vasina AstraZeneca.

“Ami-nia ekipa halo hela investigasaun iha terrenu atu rekolla dadus. Maibé, agora daudaun ha’u seidauk simu informasaun kona-bá ida-ne’e,” Ministra Saúde, Odete Maria Freitas Belo, hateten iha Palásiu Governu, kinta ne’e.

Notísia relevante:Governu-família halo’ot mate-isin Hilária de Jesus

Antes ne’e, Diretór Serbisu Saúde Munisípiu Bobonaro, João da Costa Barreto konta kronolojia, katak molok simu vasina, pesoál saúde esplika uluk ba ema hotu-hotu kona-bá vantajen hosi vasina, iha postu vasinasaun aldeia Olo-olo, suku Lour, postu administrativu Bobonaro, munisípiu Bobonaro.

“Molok fó vasina, pesoál saúde sei koko uluk matebian nia-tensaun ho rezultadu normál. Tanba ne’e maka ekipa deside fó vasina. Maibé, hafoin vasina liu minutu 30, matebian fila ba uma to’o de’it iha dalan klaran ran sai-hosi inus to’o hakotu-iis,” João da Costa Barreto hateten.

João da Costa Barreto dehan, distânsia entre postu vasinasaun ho matebian nia-uma kuaze metru 300, bainhira ran sai-hosi inus no ibun, matebian sei bele hakat tama to’o nia uma laran, no família bolu ekipa saúde maibé la konsege salva tanba ran sai makás.

Ohin lorokraik, Governu liuhosi Sentru Integradu Jestaun Krize (SIJK) Munisipál hamutuk ho família halo’ot ona mate-isin Hilária de Jesus, tuir lisan Bunak Siligatal iha aldeia Olo-olo, suku Lour, postu administrativu Bobonaro, munisípiu Bobonaro.

Notísia relevante:Hilária de Jesus hakotu-iis hafoin simu vasina AstraZeneca

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here