Hilária de Jesus hosi aldeia Olo-olo, suku Lour, postu administrativu Bobonaro, munisípiu Bobonaro, ne’ebé hakotu-iis, hafoin simu vasina AstraZeneka, kuarta (30/06/21). Imajen facebook.

BOBONARO, 30 juñu 2021 (TATOLI)—Abitante Hilária de Jesus hosi aldeia Olo-olo, suku Lour, postu administrativu Bobonaro, munisípiu Bobonaro, hakotu-iis, hafoin simu vasina AstraZeneka.

Diretór Serbisu Saúde Munisípiu Bobonaro, João da Costa Barreto konta kronolojia, katak molok simu vasina, pesoál saúde esplika uluk ba ema hotu-hotu kona-bá vantajen hosi vasina, iha postu vasinasaun ne’e.

Notísia relevante:Bobonaro preparadu simu vasina AstraZeneca doze daruak

“Molok fó vasina, pesoál saúde sei koko uluk matebian nia tensaun ho rezultadu normál. Tanba ne’e maka ekipa deside fó vasina. Maibé, hafoin vasina liu minutu 30, matebian fila ba uma to’o de’it iha dalan klaran ran sai-hosi inus to’o hakotu-iis,” João da Costa Barreto, hateten ba jornalista Agência Tatoli via telefónika, kuarta ne’e.

João da Costa Barreto dehan, distánsia entre postu vasinasaun ho matebian nia uma kuaze metru 300, bainhira ran sai-hosi inus no ibun, matebian sei bele hakat tama to’o nia uma laran, no família bolu ekipa saúde maibé la konsege salva tanba ran sai makás.

Nune’e mós Xefe suku Lour, Paulino Lopes Gomes, hateten hafoin akontesimentu autoridade lokál hamutuk ho família kontaktu kedan ho parte Sentru Integradu Jestaun Krize (SIJK) no konsege iha koordenasaun di’ak atu responsabiliza prosesu funerál.

“Autoridade lokál no família ko’alia hamutuk ona ho parte SIJK. Parte rua iha ona konkordánsia katak, sei responsabiliza to’o halo’ot mate-isin,” Paulino Lopes Gomes haktuir liu hosi telefónika.

Alende ne’e, reprezentante família Fransisco Soares Perreira, hateten desde horkalan to’o dader ne’e Ilária de Jesus di’ak hela no la sofre moras ruma, maibé família mós sente hakfodak bainhira matebian ran sai makaas hosi inus no ibun.

“Tanba ne’e ami husu responsabilidade to’o funerál no parte saúde mós prontu atu apoia kaixaun no seluk tan,” Fransisco Soares Perreira, haktuir via telefónika.

Matebian faluk Hilária de Jesus hakotu-iis ho idade 73, husik hela oan ki’ak na’in-hitu, mane na’in-lima no feto na’in-rua.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here