Serimónia halo’ot mate-isin Hilária de Jesus, tuir lisan Bunak Siligatal iha aldeia Olo-olo, suku Lour, postu administrativu Bobonaro, munisípiu Bobonaro, kinta (01/07/21). Imajen Tatoli/Sérgio da Cruz.

BOBONARO, 01 julu 2021 (TATOLI)—Governu liuhosi Sentru Integradu Jestaun Krize (SIJK) Munisipál hamutuk ho família halo’ot ona mate-isin Hilária de Jesus, tuir lisan Bunak Siligatal iha aldeia Olo-olo, suku Lour, postu administrativu Bobonaro, munisípiu Bobonaro.

Diretór Serbisu Saúde Munisípiu Bobonaro, João da Costa Barreto, hateten Governu liuhosi SIJK apoia ona kaixaun no sasán sira-seluk, no promete sei fó nafatin apoiu ba despezas ai-funan nian.

Notísia relevante:Hilária de Jesus hakotu-iis hafoin simu vasina AstraZeneca

“Ami mai la’ós atu buka se mak sala no se mak la sala. Atu vasina mak halo ama mate ka la’e, ekipa ida-ne’e mai tanba ama monu iha ami-nia leet. Ami mai atu halo’ot ama didi’ak. Ami promete iha ai-funan nian Estadu sei apoia despeza ba prosesu tomak,” João da Costa Barreto, hateten iha serimónia funerál.

Iha fatin hanesan, oan hosi matebian, Carlito de Jesus, triste tanba lakon inan, maibé tanba planu Maromak-Nian tenke simu realidade.

“Ha’u sente lakon tebes inan di’ak ida, nia la moras no di’ak hela. Depois de simu vasina mak mate liu. Maibé, ne’e mak realidade no ita tenke simu,” Carlito de Jesus  hateten ho matan-been.

Governu tenke responsabiliza Hilária de Jesus nia-mate

Família mós ezije ba Governu atu responsabiliza Hilária de Jesus nia mate, tanba realidade hatudu katak, matebian hakotu-iis hafoin simu vasina AstraZeneca, iha 30 juñu 2021.

“Ami oan-ki’ak ezije ba Governu ne’ebé promete katak, bainhira sidadaun ida mate hafoin simu vasina sei hetan osan rihun $10,” Carlito de Jesus Silva, hateten liuhosi konferénsia imprensa, iha aldeia Olo-olo, kinta ne’e.

Família mós promete sei hato’o keixa ba Provedoria Direitu Umanu no Justisa (PDHJ sígla portugés) no sosiedade sivíl atu husu justisa loloos, bainhira Governu la kumpre promesa.

“Ami la satisfás tanba ami-nia inan kondisaun di’ak hela. Bainhira ami-nia ezijénsia la responde, ami sei luta nafatin atu lori kazu ne’e ba ba prosesu legál,” nia subliña.

Xefe suku suspende vasina

Provizoriamente Xefe suku Lour, Miguel Lopes de Jesus, suspende programa vasina iha suku ne’e no husu pesoál saúde-sira atu fó klarifikasaun ba efeitu hosi vasina, mak foin bele kontinua.

“Ha’u husu atu hapara lai vasina iha aldeia ne’e, tanba populasaun barak sei trauma. Ami hein ita boot-sira atu fó informasaun loloos mak foin bele kontinua,” Xefe suku hateten.

Matebian Hilária de Jesus, moris iha 01 janeiru 1948, iha Suku Lour, postu administrativu Bobonaro, munisípiu Bobonaro, ho husik-hela oan na’in-hitu, feto na’in-rua no mane na’in-lima.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here