DILI, 01 jullu 2021 (TATOLI)—Diretór Nasionál Biblioteka no Muzeu, João Fátima da Cruz, hateten daudaun ne’e biblioteka Sekretáriu Estadu Arte no Kultura (SEAK) simu ona doasaun livru hosi instituisaun Estadu, organizasaun internasionál no biblioteka Brazil no Singapura hamutuk 8.404
Notísia Relevante: Asosiasaun Biblioteka kria ona maibé seidauk rejistu
“Daudaun ne’e, totál livru ne’ebé iha biblioteka SEAK nian hamutuk 8.404. Livru hirak ne’e oferese hosi Timor Aid, Gabinete SEAK, FALINTIL-Forsa Defeza Timor-Leste (F-FDTL), Fundasaun Mahein, Provedoria Direitu Umanus no Justisa (PDHJ), Biblioteka Brazil, UNESCO, Sala Leitura Xanana Gusmão, Ministériu Finansa, Care Internasionál no Biblioteka Singapura,” João Fátima da Cruz hateten ba Agênsia Tatoli, iha nia knaar fatin, Avenida Portugál, kinta ne’e.
Livru hirak ne’e, nia informa, tuir klasifikasaun hosi 0 to’o 900 mak livru kona-bá Filozófia, Relijiaun, Siénsia Sosiál, Língua, Siénsia Naturál no Siénsia Aplikada, Arte Múzika, Jogu, Literatura, Istória no Jeográfia, ne’ebé bele fasilita vizitante sira bele asesu.
Notísia Relevante: Konstrusaun Biblioteka Nasionál iha Faze Konkursu
Vizitante sira-ne’ebé vizita biblioteka refere, nia dehan, maihosi vizitante internasionál no maioria hosi vizitante doméstika mak universitáriu hosi Universidade Nasional Timor Lorosa’e (UNTL), Universidade da Paz (UNPAZ), Institute of Business (IOB), Institute of Tecnology (DIT), Institutu Profisionál de Canossa (IPDC), Institutu Superior Cristál (ISC), Institutu Siénsia Relijioza (ICR) Lahane, no Universidade Díli (UNDIL).
“Estudante sira mai iha biblioteka ne’e halo peskiza no halo sira-nia Trabalho Para Casa (TPC). Enkuantu, livru sira iha ne’e mesak hakerek ho dalen Portugés, Inglês, Maláiu (Bahasa Indonesia) no dalen Tetun,” nia hateten.
Totál funsionáriu permanente iha Dirasaun Nasionál Biblioteka no Muzeu hamutuk 19 no funsionáriu kazuál na’in-17, no hosi númeru ne’e kompostu hosi funsionáriu sira iha biblioteka Dili no munisípiu.
Notísia Relevante: KM Aprova Rezolusaun Konstrusaun Biblioteka Nasionál
Jornalista : Nelia Fernandes
Editór : Cansio Ximenes
