Dezeñu biblioteka nasionál. Imajen espesiál

DILI, 15 maiu 2019 (TATOLI)—Diretora Jerál Kultura hosi Sekretaria Estadu Arte no Kultura (SEAK), Cecília Maria Belo de Assis, hateten konstrusaun biblioteka nasionál sei iha faze konkursu tanba faze preparasaun terenu finaliza ona iha fulan kotuk.

Biblioteka nasionál ne’e, nia esplika, finansiamentu mai hosi Kompañia Petróliu Itália nian naran “Eni” ne’ebé iha tinan 2018 esplora mina Kitang iha tasi Timor,  entaun nia fó kontribuisaun sosiál ida mai Timor-Leste ho totál orsamentu $10.000,000 (dez milhões).

“Faze preparasaun terrenu ne’ebé foin dadauk halo ne’e, uza governu nia orsamentu. Rai iha ona. Preparasaun atu ateru ka halo drainazen no moru, ita halo tiha ona. Kompañia “Eni” mai harii biblioteka moderna ho andar tolu. Kompañia ne’e loke tiha ona avizu konkursu ba konstrusaun iha dezembru 2018. Agora iha faze selesaun dokumentu. Prosesu konstrusaun sei iha hela prosesu konkursu,” Cecília ba jornalista TATOLI liuhusi entrevista ne’ebé hala’o iha nia kna’ar fatin, Avenida Portugal, Dili, kuarta (15/5/2019).

Nia hatutan, Kompañia Petróliu “Eni” ninia responsabilidade maka atu harii biblioteka no prepara ekipamentu ba biblioteka nian. Governu Timor-Leste nia responsabilidade maka prepara rai, halo formasaun ba funsionáriu sira, bolsu estudu la’o dadaun no materiál sira hanesan livru iha tiha ona.

“Ekipa ne’ebé haree sasán sira ne’e mak kompañia Eni, SEAK, ANPM (Autoridade Nasionál Petróliu no Minerál) no Obra Públika involve ministériu sira ne’ebé ninia área serbisu relevante ba ida ne’e. Ita iha tiha ona dekretu lei ba biblioteka nasionál, dekretu lei ba depózitu legál, ita iha funsionáriu ema 20 ne’e tuir formasaun regulár. Ita iha livru hamutuk 2000 ne’ebé agora rai hela iha ne’e. Tinan-tinan Diresaun Nasionál Biblioteka halo akizisaun ba ita-nia eskritór timoroan sira ne’ebé mak hakerek,” Cecília haklaken.

Diretora ne’e informa, rai ne’ebé atu halo konstrusaun biblioteka nasionál iha Bairru-Pite, Dili, atribuisaun hosi Ministériu Justisa ho medida mil 27 kuadradu. Faze preparasaun terrenu halo hosi Sekretaria Estadu Arte no Kultura no ANPM ho orsamentu Estadu nian.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here