iklan

EDUKASAUN, DILI, HEADLINE

Asosiasaun Biblioteka kria ona maibé seidauk rejistu

Asosiasaun Biblioteka kria ona maibé seidauk rejistu

Diretór Nasionál Biblioteka no Muzeu, João Fátima da Cruz.

DILI30 juñu 2021 (TATOLI)—Diretór Dirasaun Nasionál Biblioteka no Muzeu, João Fátima da Cruz, informa Asosiasaun Biblioteka no Informasaun Timor-Leste (ABITL) kria tiha ona iha 2020 no membru hosi biblioteka ne’ebé eziste iha Díli no Munisípiu kuaze 50-resin halo ona diskusaun ba estatutu, maibé seidauk rejistu iha Ministériu Justisa.

Notísia Relevante: Governu Sei Kria Asosiasaun Biblioteka Timor-Leste

“Asosiasaun Biblioteka nia estatutu iha ona diskusaun no atu lori ba rejistu iha notariadu Ministériu Justisa maibé to’o agora ami mós seidauk rejistu tanba seidauk hetan informasaun hosi prezidente ABITL. Tanbá mosu COVID-19, nia mós la fó informasaun kona-ba rejistu ona ka seidauk,” João Fátima da Cruz hateten ba Agência Tatoli, iha nia knaar fatin, Avenida Portugal, Dili, kuarta ne’e.

Rejistu iha notariadu ne’e atu formaliza asosiasaun ne’e maibé antes ne’e sira rejistu ona iha Forum Organizasaun Naun Governamentál Timor-Leste (FONGTIL), tanbá FONGTIL mak responsabiliza ba asosiasaun ida-ne’e maibé hakarak formál liu tenke rejistu iha notariadu Ministériu Justisa nian.

“Tanba estatutu ne’e iha ona diskusaun. Depois ami halo ona workshop iha loron rua, atu lori ba iha administrasaun maibé to’o agora ami seidauk hetan informasaun hosi Presidente Asosiasaun Bibleoteka Timor-Leste (ABITL),” nia dehan.

Entretantu Presidente Asosiasaun Biblioteka no Informasaun Timor-Leste (ABITL), Margarida Mesquita Soares, hateten nia parte iha problema ho rejistu iha Ministériu Justisa (MJ) tanba tenke prenxe rekezitu ne’ebé Governu liu-liu Ministériu Justisa termina.

“Ami iha problema ho rejistu iha Ministériu Justisa, tanbá ida-ne’e ami kontinua nafatin halo ami-nia programa sira hanesan kapasitasaun ba rekursu umanu kona-ba biblioteka nian. Falta programa seluk atu ezekuta tan mak ami sei hein hela planu atu lori ba Ministériu Justisa ami seidauk atinje,” nia hateten.

Prosesu ba faze rejistu iha notariadu ne’e, halo ona konsultasaun ho Ministériu Justisa oinsá atu kria asosiasaun ida-ne’e atu rejista iha ne’ebé no sira fó ona informasaun kona-ba rekezitu atu lori ba iha Ministériu Justisa.

“Ami mai prepara ona dokumentu no ami hein hela atu halo tradusaun ba portugués. Ami komesa halo ona no sei fó hela ba revizór ida atu halo revizaun ne’e mak seidauk kompleta. Tanba ne’e mak ami sei hein hela ne’e,” nia dehan.

Kritéria hosi Ministériu Justisa, nia hateten, primeiru tenke iha fatin ka edifísiu própriu, mapeamentu no tenke iha konta bankaria rasik.

Ministeriu Justisa ezije tenke hatama konta bankaria ne’e hanesan obstakultu ne’ebé difikulta tebes, maibé nu’udar Przsidente ba asosiasaun ida-ne’e kontinua nafatin luta para oinsá lori duni asosiasaun ne’e ba oin.

Totál membru Asosiasaun Biblioteka no Informasaun Timor-Leste (ABITL) hamutuk na’in-20-resin ne’ebé maihosi Biblioteka Nasionál inklui Biblioteka Universitáriu Institute of Tecnology (DIT), Universidade Nasional Timor Lorosa’e (UNTL), Universidade Díli (UNDIL), Biblioteka Parlamentu, Biblioteka Komunitáriu no Biblioteka Eskola.

“Ami involve sira hotu, hodi faz parte iha asosiasaun ne’e,” nia hateten.

Jornalista : Nelia Fernandes 

Editór       : Cancio Ximenes

iklan
iklan

Leave a Reply

iklan
error: Content is protected !!