Papa Francisco. Imajen Espesiál

DILI, 30 juñu 2021 (TATOLI)—Reprezentante Vatikanu iha Timor-Leste, Núnsiu Apostóliku Monseñor Marco Sprizzi, kuarta ne’e transmite mensajen hosi amo papa katak Papa Francisco iha vontade atu mai Timor-Leste.

Notísia Relevante: Resprezentante Vatikanu: “Vizita Papa Francisco Mai Timor-Leste La Kansela Maibé Adia”

“Ohin, ha’u transmite mensajén hosi Santo Padre Papa Francisco katak Papa Francisco iha vontade atu mai Timor-Leste hodi hatan dala tolu ‘ha’u sei ba, ha’u sei ba, ha’u sei ba’ iha Timor leste,” Reprezentante Vatikanu ne’e hateten ba jornalista sira, hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau LObato, Bairru Pite, Dili, kuarta ne’e.

Núnsiu Apostóliku Monseñor Marco Sprizzi hatutan, ida-ne’e mós defende ba evolusaun pandemia COVID-19, tanba-ne’e mak enkoraja ema hotu atu simu vasina nune’e bele proteje-aan. Tanba, nia dehan, Papa Francisco nia preokupasaun ne’e mak presiza proteje-aan, nune’e simu Papa Francisco nia vizita ne’e ho seguru.

Aleinde ne’e, Reprezentante Vatikanu ne’e mós hato’o agradasimentu ba Prezidente Repúblika, Parlamentu Nasionál, Primeiru-Ministru, nomós ba impozisaun hotu-hotu iha parlamentu bele aprova mudansa ba lei migarasaun no azilu, nune’e bele kumpre kona-ba konkorda entre Timor-Leste ho Vatikanu ne’ebé estabelese rezidénsia ba misionáriu sira.

Notísia Relevante: PN aprova projetu-lei migrasaun no azilu iha jeneralidade

“Rezidénsia ba misionáriu sira-nian mós presiza renova kada tinan maibé ida-ne’e mós konforme ba akordu entre vatikanu ho Timor-Leste. Tanba Parlamentu Nasionál mak hanesan órgaun soberania hodi aprova mudansa ba lei no kumpre ba ezijénsia hodi permite misionáriu sira-ne’ebé mak hetan sertifikadu hosi Bispu, Embaixada no Postura Apostólika, nune’e iha rezidénsia ba tinan lima (5) bele renova hodi hala’o misaun misionáriu sira atu haree no nesesita sarani ne’ebe fraku iha fiar,” nia dehan.

Ho ida-ne’e, Papa Fransicao mós hato’o agradese ba Prezidente Repúblika, Parlamentu Nasionál no autoridade tomak inklui deputadu sira, nune’e bele realiza asuntu ne’e.

Aleinde ne’e, nia dehan, Papa Francisco husu atu proteje nafatin sidadaun sira hosi moras COVID-19, tanba durante ne’e Papa Francisco mós akompaña situasaun kada loron no akompañia ho orasaun, nune’e proteje nafatin iha pás no armónia iha rai doben ida-ne’e.

Iha enkontru ne’e Prezidente Repúblika, Francisco Lú Olo, hato’o agradese ba Papa Francisco ba-nia mensajen tomak nomós konkorda konteudu ba preokupasaun hosi Papa Farncisco nian ba kondisaun sanitária ne’ebé presiza garante seguransa bainhira Papa vizita mai Timor-Leste.

Notísia Relevante: Tanba Situasaun Coronavirus, Papa Francisco Adia Vizita Mai Timor-Leste

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here