Imajen/Media PR.

DILI, 27 abríl 2021 (TATOLI)—Reprezentante Povu iha uma fukun Parlamentu Nasionál, tersa ne’e aprova ona projetu-lei migrasaun no azilu iha faze jeneralidade.

Projetu-lei númeru 25/V/(3a), prosede ba alterasaun dahuluk Lei númeru 11/2017, 24 maiu kona-ba Lei Migrasaun no Azilu, aprovadu iha faze jeneralidade ho rezultadu votasaun a-favór 48 no abstensaun lima (5).

“Projetu-lei númeru 25/V/(3a) aprovadu iha jeneralidade. Tuir mai ba espesialidade ba projetu-lei ida-ne’ebé simples ho asuntu espesífiku no tuir rekomendasaun hosi Komisaun B nian presiza melloramentu antes parlamentu aprova iha finál gobál. Tanba asuntu ne’e simples meza fó tempu semana ida, iha tersa-feira, ita bele halo votasaun finál globál,” Prezidente Parlamentu Nasionál (PPN), Aniceto Longuinhos Guterres Lopes, anunsia liuhosi plenária hafoin halo apresiasaun ba projetu-lei refere.

Iha asuntu ne’e, komisaun espesializada permanente sira konsidera ho forma konjunta iha proposta-alterasaun atuál liuhosi Projetu-Lei (PJL-sigla portugés), espesifikamente hodi halo análize ba proposta-alterasaun ba artigu sira hanesan 13, 14, 59, no 127 iha Lei númeru 11/2017, 24 maiu kona-ba Lei Migrasaun no Azilu.

Proponente ba projetu-lei ne’e mai hosi Deputadu sira iha Komisaun B ne’ebé trata asuntu Negósiu Estranjeiru, Defeza no Seguransa.

Objetivu prinsipál hosi projetu-lei atu fó biban misionária katólika sira-nia estensaun vistu tanba durante ne’e estensaun vistu ba tinan rua (2) de’it maibé iha proposta-alterasaun ne’e ba tinan lima (5).

Vise-Ministru Interior, António Armindo, esplika uluk parte Governu mak inisia tiha inisiativa ho tipu proposta-lei maibé oras ne’e Komisaun B mak inisia ho tipu projetu-lei.

Nia esplika, iha projetu-lei ne’e parte Governu konsidera proponente sira-nia proposta artigu 59 ho espesífika kona-ba autorizasaun temporária ba misionária Katólika sira bazea ba konkordata entre Timor-Leste ho Santa Sé.

“Regra baibain ita-nia tékniku sira implementa bazea de’it ba artigu 59 katak vistu ne’e fó de’it ba tinan rua (2). Tinan rua (2) ne’e fó ba sidadaun estranjeiru inklui mós ita-nia misionáriu sira, tanba konkordata ho Santa Sé katak ita presiza konsidera ba longu prazu ba misionáriu sira. Di’akliu ita liu uluk dalan legal, nune’e Servisu Migrasaun aplika tinan lima (5) ba ita-nia misionáriu katólika sira, atu nune’e bele halo tratamentu dignu ba sira,” Vise-Ministru ne’e hateten.

Prezidente Komisaun A ne’ebé trata asuntu Justisa no Konstitusionál, Deputadu Joaquim dos Santos, esplika iha projetu-lei atu iha tratamentu difrensa entre sidadaun komún ho sidadaun estranjeiru misionária katólika sira.

“Komisaun A nia hanoin mak ne’e, se bele karik ba tinan neen (6) maibé Komisaun B haree katak di’akliu mak tinan lima (5). Signifika renova dala-ida ba tinan 10, tuir mai nia bele hetan estatutu permanente. Se ida-ne’e parlamentu konkorda, ita aprova. Se la konkorda bele iha proposta seluk iha espesialidade, ita bele haree hamutuk. Importante mak ita rezolve baze ida mai hosi konkordata,” Prezidente Komisaun A ne’e esplika.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here