Reprezentante Estadu Vatikanu iha Timor-Leste, Núnsiu Apostóliku, Monseñor Marco Sprizzi, bainhira hala’o audiénsia ho Prezidente Repúblika, Francisco Guterres Lú Olo iha Palásiu Prezidensiál Bairro Pité, Segunda (10/03). Imajen /Egas Cristovão

DILI, 10 marsu 2020 (TATOLI)–Reprezentante Vatikanu iha Timor Leste, Núnsiu Apostóliku, Monseñor Marco Sprizzi, hala’o sorumutu ho Prezidente Repúblika (PR), Francisco Guterres “Lú Olo”, hodi atualiza Papa Francisco nia vizita mai Timor Leste (TL).

Hafoin bala’o sorumutu ne’e, nia infroma, tuir loloos Papa Francisco hala’o Vizita mai Timor-Leste iha tinan ida ne’e (2020) maibé tanba oras ne’e daudaun Coronavirus hamate ema barak iha mundu, entaun Papa Francisco adia nia vizita mai Timor-Leste hodi muda fali ba tinan  oin (2021).

“Ha’u mai ko’alia tanba Prezidente Repúblika konvida ona Papa Francisco no Santo Padre rasik aseita ona ho konvite ne’e. Ita halo ona serbisu durante fulan rua nia laran, atu prepara ba vizita ida ne’e. Maibé, ho kazu boot Coronavirus ne’ebé akontese iha mundu, nune’e ita hakarak atu evita virus ne’e labele da’et,” dehan Monseñor Marco Sprizzi ba jornalista sira hafoin hala’o sorumutu ho Prezidente Repúblika (PR), Francisco Guterres “Lú Olo”, iha palásiu Prezidensiál Bairru Pité, Dili.

Tanba, nia hatutan, bainhira Santo Padre mai Timor klaru ema barak sei halibur malu iha ne’e mai hosi fatin oin-oin nomós posibilidade atu Coronavirus ne’e bele da’et no Papa Francisco lakohi virus ne’e da’et ba ninia povu iha rai-doben Timor-Leste ne’e.

Reprezentante Vatikanu ne’e hateten, Santu Padre rasik mós sei mai ho ema barak husi Itália hanesan Kardiál, Bispu sira, akompaña mós ho jornalista sira ne’ebé sei mai hamutuk iha aviaun ida no posibilidade bele lori mós virus ne’e mai Timor.

Tanba nee, nia dehan, Papa Francisco konfirma kona-ba ninia aseitasaun no adia data Vizita mai Timor Leste ba tinan oin (2021) mai.

“Ida ne’e hanesan sakrifisiu ne’ebé ita hotu tenke halo hodi aseita ba povu nia di’ak, ba ema hotu nia di’ak, hodi hamenus rsiku da’et husi Coronavirus ne’e,” Monseñor Marco esplika tan.

Amu Papa Francisco. Imajen/AP

Nia informa, Santo Padre hakarak agradese ba Prezidente Repúblika Francisco Guterres “Lú Olo”, Primeiru-Ministru Taur Matan Ruak, Ministru Negósiu Estranjeiru no Kooperasaun (MNEK), no altu autoridade sira seluk, nune’e mós Kay Rala Xanana Gusmão ne’ebé antes ne’e aseita ona hodi sai hanesan koordenadór jerál hodi simu Vizita Papa Francisco, hanesan líder másimu ba Komisaun Organizadora.

Kona-ba data fixu ba vizita Papa nian iha tinan oin, Monseñor Marco Sprizzi dehan, seidauk klaru tanba depende ba novidade bainhira hatudu katak Coronavirus kuandu diminui ona maka bele haree hodi konfirma ho ajenda Papa Francisco nian.

“Maske Papa ninia ajenda ne’e mundiál ne’ebé nakonu maibé Vizita ida atu mai Timor-Leste ne’e tama iha primeiru interese Papa nian. Entaun, ha’u konvida ita hotu atu akompaña ho kontaktu iha nível diplomátika, atu bele defini data kuandu posivel ona,” nia dehan.

Agora, nia husu nba timoroan tomak atu hala’o serbisu tuie ema ida-idak ninia estilu moris nian ne’ebé nakonu ho respeitu ba ema seluk, hodi evita Coronavirus la bele da’et.

“Labele tauk! Labele pániku! Maibé, nafatin hela iha trankilidade, nakonu ho esperansa. Prezidente Repúblika konkorda ho desizaun ne’e no agradese ba Santu Padre,” Monseñor Marco hateten.

Notísia Relevante: Papa Francisco Adia Vizita Mai Timor-Leste

Jornalista : Cipriano Colo

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here