Governu no Parlamentu Nasionál diskute pedidu renovasaun deklarasaun Estadu Emerjénsia ba dala-XV hosi Prezidente Repúblika, iha sala plenária PN, kuarta (30/06). Imajen TATOLI/Egas Cristóvão

DILI, 30 juñu 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, hateten, Governu rekoñese efeitu hosi vasina prevensaun COVID-19 bele redús númeru infesaun moras ne’e, tanba ne’e iha ambisaun atu atinje meta kada loron vasina ema 10.000.

“Maski alkansa ona rezultadu di’ak, Governu manifesta ambisaun, iha semana hirak oin mai bele aumenta ninia meta kona-ba númeru imunizasaun lorloron ba ema hamutuk 10.000, hodi reforsa ho empeñu, vigór, enerjia, no atividade nesesária, nune’e bele kobre pelumenus populasaun 80% iha Timor-Leste ho idade 18 ba leten to’o tinan ne’e nia rohan,” Ministru hateten durante debate estensaun Estadu Emerjénsia ba dala-XV, iha sala plenária, Parlamentu Nasionál (PN), kuarta ne’e.

To’o loron 28 juñu 2021, Sala Situasaun, Sentru Integradu Jestaun Krize (CIGC, sigla portugés), rejista kazu pozitivu 20, rekuperadu 57 no kazu ativu 801, ne’ebé antes ne’e iha inísiu fulan-juñu kazu ativu kuaze 2.000 maibé daudaun kada loron númeru kazu ativu tun no númeru rekuperadu sa’e.  

Ho hanoin hirak ne’e, maka Governu hakarak ezekuta lalais kampaña vasina ho efikásia tanba Governu konsidera ho de’it vasina ba populasaun tomak maka sei proteje saúde públika iha Timor-Leste no asegura regresu neneik ba normalidade sosiál no ekonómika, ne’ebé afeta maka’as hosi situasaun pandémika ne’ebé mosu hosi marsu 2020.

Tuir Portavós Governu, efeitu vasina atinje ona 50% iha munisípiu Dili rasik no 12% iha munisípiu sira seluk.

“Sorte di’ak ita bele evita senáriu a’at liu no hamamar medida balun hodi satán pandemia ne’e, liuliu hapara konfinamentu ba populasaun iha sidade Dili, ne’ebé iha fulan kotuk, situasaun hamosu preokupasaun maka’as tebes,” governante ne’e rekoñese.

Notísia relevante: Governu hakotu konfinamentu domisiliáriu no autoriza hikas movimentu transporte públiku

CIGC relata iha domingu (27/06), katak ema ho idade 18 ba leten iha territóriu tomak hamutuk 25.421 (3,37%), kompleta ona vasina prevensaun COVID-19 doze daruak, enkuantu ema 193.955 (25,7%) simu ona vasina doze dahuluk.

Hosi totál ne’e, ema hamutuk 108.963 (51,0%) iha Dili mak simu ona vasina doze dahuluk no ema hamutuk 13.966 (6,53%) mak simu ona vasina doze daruak.

Ministru dehan, AstraZeneca no SinoVac ne’ebé Timor-Leste konsege asesu, liuhosi sistema kooperasaun internasionál Nasaun Unida ne’ebé koñesidu ho naran COVAX inklui kooperasaun bilaterál entre Governu no Austrália, Repúblika Populár Xina, ne’ebé to’o loron 09 juñu 2021, simu vasina besik doze 295.800, nune’e durante fulan-juñu bele habelar ezekusaun planu nasionál vasinasaun, ne’ebé agora ativu iha munisípiu inklui Rejiaun Administrativa Espesiál Oé-cusse Ambeno (RAEOA).

Notísia relevante: Ema 25.421 (3,37%) iha territóriu tomak kompleta vasina doze daruak

Governu konsidera rezultadu di’ak ne’ebé alkansa, tanba esforsu koordenasaun interdepartamentál ne’ebé dezenvolve ona to’o oras ne’e liuhosi kolaborasaun ho Organizasaun Mundiál Saúde (OMS) no parseiru dezenvolvimentu inklui organizasaun governamentál no la’ós governamentál nasionál no internasionál sira.

“Governu reafirma ninia entendimentu ba sentralidade no nesesidade atu kontinua mobiliza ema hotu nia partisipasaun, la’ós de’it hosi funsionáriu sira hosi liña frente, ajente saúde, seguransa, defeza no protesaun sivíl, maibé hosi sidadaun hotu, família sira, funsionáriu setór privadu, empreza, organizasaun sosiedade sivíl no organizasaun komunitária sira, iha esforsu nasionál no unitáriu atu kombate pandemia ne’e,” nia subliña.

Mobilizasaun nasionál ne’ebé Governu konvoka, ejize ema hotu respeita nafatin prátika di’ak individuál ka koletiva ba prevensaun COVID-19, liuliu iha momentu mosu variante foun, vírus da’et lalais liu iha nasaun viziñu sira.

“Tanba ne’e, importante atu ita idaidak asume responsabilidade no tau-matan ba ita-nia saúde no ema seluk nia saúde, liuhosi prátika sira hanesan uza máskara, fase liman beibeik no kumpre regra distansiamentu sosiál,” Ministru fó hanoin.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here