Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (16/06). Imajen TATOLI/Egas Cristóvão

DILI, 16 juñu 2021 (TATOLI)–Governu liuhosi reuniaun Konsellu Ministru (KM) iha kuarta ne’e, deside hakotu konfinamentu domisiliáriu jerál iha munisípiu Dili, maibé renova hikas Serka Sanitária, nune’e bele fó fleksibilidade ba movimentu.

“Konsellu Ministru deside la renova impozisaun konfinamentu domisiliáriu jerál populasaun iha Dili, ho nune’e medida sira ne’ebé antes ne’e prevee atu limita movimentasaun, bele reativa hikas hanesan transporte públiku hodi bele hala’o movimentu no atividade seluk ne’ebé halibur ema barak, liuliu atividade ekonómika nian,” Ministru Prezidénsia Konselu Ministru, Fidelis Manuel Leite Magalhães, hateten, hafoin reuniaun ezekutivu, iha salaun auditóriu Ministériu Finansa (MF), Aitarak-laran.

Notísia relevante: Serka sanitária Dili, Bobonaro no Covalima kontinua to’o loron 14

Desizaun ne’e Governu foti hafoin halo análiza ba aprezentasaun hosi Sala Situasaun, Sentru Integradu Jestaun Krize (CIGC, sigla portugés), kona-ba pontu situasaun epidemiolójika país .

Ministru dehan, relasiona ho prosesu aprendizajen, sei hein despaisu hosi Ministériu Edukasaun, Juventude no Desportu (MEJD) no Ministériu Ensinu Superiór Siénsia no Kultura (MESSK).

“Tuir medida ezekusaun Estadu Emerjénsia, hateten katak desizaun kona-ba eskola sei halo tuir diploma ministeriál, signifika hosi ministériu relevante mak foin haree situasaun, no hasai desizaun liuhosi diploma ministeriál, ne’ebé ikus mai, konfinamentu obrigatóriu iha munisípiu Dili la automátika implika katak eskola sira reativa,” nia esplika.

Nune’e, atividade sira normaliza hikas fali, katak atividade sira ne’ebé antes ne’e bandu iha períodu konfinamentu obrigatóriu ne’e bele hala’o hikas.

Maski nune’e, Governu husu ba motorista sira atu impoin nafatin rekezitu sira hanesan uza máskara, garante distansiamentu másimu posível iha transporte públiku sira.

Biban ne’e, KM aprova mos Projetu Rezolusaun Governu, nian ne’ebé mantein impozisaun serka sanitária iha munisípiu Baucau, Bobonaro, Dili no Covalima, ba loron hitu tan.  

Nune’e, bandu nafatin sirkulasaun ema sira entre munisípiu impoin serka Sanitária no sirkunskrisaun administrativa sira seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian.

Jornalista  : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here