Pesoál saúde fó vasina ba abitante, iha sentru saúde iha Dili. Imajen TATOLI/António Gonçalves

DILI, 27 juñu 2021 (TATOLI)–Sala Situasaun, Sentru Integradu Jestaun Krize (CIGC, sigla portugés), informa, to’o domingu dadeer tuku 10:00, tuir sistema informasaun iha Ministériu Saúde (MS) fó sai katak ema hamutuk 25.421 (3,37%) ho idade 18 ba leten iha territóriu tomak kompleta ona vasina prevensaun COVID-19 doze daruak.

Enkuantu, ema 193.955 (25,7%) simu ona vasina doze dahuluk.

Hosi totál ne’e, ema hamutuk 108.963 (51,0%) iha Dili mak simu ona vasina doze dahuluk no  ema hamutuk 13.966 (6,53%) mak simu ona vasina doze daruak.

“Aproveita hato’o ba populasaun katak ema ne’ebé detetatu positivu, bainhira rekuperadu ona bele simu vasina doze dahuluk ka doze daruak no laiha kontra indikasaun médika,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, hateten, liuhosi nota imprensa ne’ebé Agência TATOLI asesu, domingo ne’e.

Vasina AstraZeneca doze daruak lansa iha loron 10 juñu, iha kapitál Dili, hafoin iha loron 14 juñu lansa iha munisípiu seluk.

Notísia relevante: MS lansa vasina AstraZeneca doze daruak

Tuir Portavós CIGC, iha ‘Sertifikadu Alta’ hosi izolamentu, hakerekinformasaun katak ‘ema ne’ebé rekuperadu, di’ak liu hein to’o másimu fulan-neen, sura hosi loron alta, maka foin simu vasina’ tanba momentu ne’ebá númeru vasina seidauk sufisiente.

“Informasaun ida-ne’e fó sai ho baze númeru vasina seidauk sufisiente atu kobre populasaun Timor-Leste tomak. Maibé tanba agora iha ona númeru vasina boot, maka ema hotu ne’ebé rekuperadu hosi moras COVID-19, bainhira hakarak simu ona vasina, bele hakbesik ba postu vasina, atu simu vasina,” Koordenadór apela.

Aleinde ne’e, Sala Situasaun informa ba populasaun tomak katak ema ne’ebé simu ona vasina doze daruak hasoru vírus SARS-CoV-2 (AstraZeneca ka Sinovac) ne’ebé rekoñesidu hosi Organizasaun Mundiál Saúde (OMS), bele ona sirkula livremente tama ka sai hosi rejiaun impoin Serka Sanitária no la presiza hetan autorizasaun esesionál hosi CIGC.

Notísia relevante: Governu mantein Serka Sanitária iha Baucau-Dili no hakotu Bobonaro-Covalima

Koordenadór fó hanoin, bainhira sente moras isin-manas, mear, kakorok moras ka sintoma seluk tan, bele ba konsulta iha Sentru Saúde besik no bele halo teste swab.

Nune’e, bainhira atu husu autorizasaun esesionál sai hosi Serka Sanitária iha Dili, bele ba halo swab iha Sentru Konvensaun Dili (CCD, sigla portugés).

Nune’e mós, bainhira sente katak iha kontaktu besik ho ema ruma ne’ebé detetadu pozitivu ona no seidauk hetan kontaktu hosi ekipa konjunta saúde bele liga ba númeru 119 atu organiza submete ba teste swab.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here