Governu realiza Jornada Orsamentál ba preparasaun OJE 2021, iha salaun Ministériu Finansa, Aitarak-Laran, tersa (04/08). Imajen TATOLI/Florêncio Miranda Ximenes

DILI, 29 juñu 2021 (TATOLI)—Governu liuhosi Ministériu Finansa (MF) hamutuk ho Unidade Planeamentu, Monitorizasaun no Avaliasaun (UPMA), iha tersa ne’e realiza Semináriu Nasionál Jornada Orsamentál ba Orsamentu Jerál Estadu (OJE) 2022 durante loron-ida ho tema ‘Kualidade Orsamentu, Kresimentu Inkluzivu no Sustentavel’.

Jornada Orsamentál prezide hosi Primeiru-Ministru (PM), Taur Matan Ruak ho objetivu prinsipál atu diskute prioridade nasionál no determina tetu fiskál ne’ebé realístiku ba orsamentu tinan oin.

Tuir nota MF ne’ebé Agência TATOLI asesu iha segunda ne’e, durante abertura sesaun ne’e, Ministru Finansa, Rui Augusto Gomes, hato’o nia perpetiva katak to’o ohin loron, Timor-Leste iha de’it instrumentu ida hanesan OJE, ne’ebé Governu uza hodi provoka kreximentu no dezenvolvimentu ekonómiku, tanba ne’e atu halo instrumentu ne’e sai efetivu no efikáz, presiza halo melloramentu lubuk ida iha rejime orsamentál no jestaun finansa públika.

“Orsamentasaun bazeia ba programa, nu’udar meiu atu garante osan sira ne’ebé kada tinan ita foti hosi Fundu Petrolíferu, kobransa impostu hosi kontribuinte, no empréstimu hosi doadór sira, fó duni benefísiu ba povu, hadi’a kualidade prestasaun servisu públiku, no alkansa meta sira ne’ebé mak Governu aprova ona,” Ministru subliña iha salaun auditóriu MF, Aitarak-laran, tersa ne’e.

Notísia relevante: Hahú aban, Governu realiza jornada orsamentál 2022

Durante Jornada Orsamentál, ekipa téknika hosi MF no UPMA halo aprezentasaun kona-ba Diretiva tuir Planu Estratéjiku Dezenvolvimentu Nasionál (PEDN) 2011-2030 no atualizasaun progresu sira ne’ebé atinje ona, liga ho PEDN no Planu Rekuperasaun Ekonómika (PRE).

Ekipa téknika sira aprezenta avaliasaun impaktu COVID-19 ba atividade sosiu-ekonómiku ho ninia implikasaun fiskál no ekonómiku, nesesidade no medida esensiál ne’ebé presiza estabelese ba prevensaun no protesaun grupu vulnerável inklui implikasaun jéneru no norma sosiál.

Ofisiál hosi Banku Sentrál Timor-Leste (BCTL, sigla portugés) aprezenta tópiku Dezenvolvimentu Setór Finanseiru iha Timor-Leste, Banku Nasionál Komérsiu Timor-Leste (BNCTL, sigla portugés) aprezenta kona-ba papel Banku Komérsiu iha dezenvolvimentu setór privadu: ‘dezafiu, oportunidade no perspetiva sira ba futuru’.

Deside tetu fiskál realístiku

Semináriu ne’e sei konklui ho diskusaun no aprezentasaun kona-ba proposta programa prioridade sira hodi deside tetu fiskál ne’ebé realístiku ba proposta OJE 2022, ne’ebé sesaun diskusaun ne’e sei lidera hosi Xefe Governu no Ministru Finansa.

Iha OJE 2021, VIII Governu Konstitusionál hahú implementa orsamentu bazeia ba programa ho forma kompletu, maibé ba tinan oin hanesan tranzisaun ida hosi orsamentu bazeia ba verba ne’ebé mak implementa desde Timor-Leste restaura ninia independénsia tinan 19 liubá.

Elementu xave ida hosi OJE 2021 mak oinsá ita rekupera filafali ekonomia ne’ebé iha tinan haat nia laran enfrenta resesaun tolu, ne’ebé iha rekuperasaun ne’e seidauk akontese tuir planu tanba Timor-Leste hahú tinan ne’e ho moras COVID-19 no kalamidade dezastre naturál.

Hafoin rona aprezentasaun hosi ekipa téknika MF no UPMA, iha loron 23 juñu 2021, Konsellu Ministru aprova projetu deliberasaun Kritériu Rasionalizasaun Estrutura Programátiku OJE 2022, ne’ebé Governu halo ona alterasaun balun iha rasionalizasaun estrutura programátiku atu hasa’e efisiénsia no efikásia iha ezekusaun, no hadi’a liután kapasidade monitorizasaun no kontrolu ba implementasaun programa ho atividade sira ne’ebé Governu propoin.

Notísia relevante: Reuniaun KM: MF aprezenta kritériu rasionalizasaun estrutura programátiku OJE 2022

Ho introdusaun polítika foun ne’e, ba oin VIII Governu Konstitusionál hakarak atu asegura servisu públiku ne’ebé prudente, ho rasiosinu sosiu-ekonómiku, hakat hosi orsamentu pur verba ba orsamentu pur programa hodi asegura rezultadu reál hosi ezekusaun.

Ho nune’e, la’ós persentajen ezekusaun de’it, maibé sei redús númeru programa hosi 145 tun ba másimu programa 30 hodi fó biban ba Governu foku ba kualidade no kontrolu ezekusaun OJE.

Semináriu ne’e partisipa hosi membru VIII Governu Konstitusionál tomak, reprezentante hosi Parlamentu Nasionál, Autoridade Munisipál no Rejiaun Administrativa Espesiál Oé-cusse Ambeno (RAEOA), Sosiedade Sivíl, Jestór no Tékniku iha instituisaun Estadu, Asesór sira inklui komunidade mídia.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here