Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (23/06). Imajen TATOLI/Egas Cristóvão

DILI, 23 juñu 2021 (TATOLI)—Ministru Finansa (MF), Rui Augusto Gomes, aprezenta Projetu Deliberasaun ida ne’ebé hetan aprovasaun, kona-ba kritériu rasionalizasaun estrutura programátiku hosi Orsamentu Jerál Estadu (OJE) ba tinan 2022.

Tuir Ministru Prezidénsia Konsellu Ministru, Fidelis Manuel Leite Magalhães, orsamentu tinan oin halo alterasaun balun hodi hasa’e efisiénsia no efikásia iha ninia ezekusaun.

“Nune’e mós atu hasa’e kapasidade monitorizasaun no kontrolu ba implementasaun programa ho atividade ne’ebé propoin hosi kada instituisaun Estadu,” Portavóz Governu relata hafoin reuniaun ezekutivu iha Palásiu Governu, kuarta ne’e.

Notísia relevante: UPMA-MF hahú prepara OJE 2022 sei iha redusaun programa

Hahú loron 01 janeiru 2021, Governu hahú ezekuta OJE 2021 ho montante biliaun $1,895, ne’ebé hosi montante ne’e biliaun $1,377 hosi fundu petrolíferu no reseita naun petrolíferu millaun $508.

Orsamentu tinan ne’e kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Nune’e, hafoin retifika, montante osan ne’e sa’e ba biliaun $2,030, maibé tama ona fulan klaran ezekusaun foin atinje 30% tanba situasaun atuál difikulta movimentu atu ezekuta programa.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here